Lasenai 34 - Ngudradreadrekadhane Ka Sisiu 魯凱語聖經

Wadrengedrengere ku tharirane ki Twaumase

Ku Davidi yakai cucubungu ki Abimileke ngikaamamama sa kipakatwasenga yai, la tusenai kikai.

¹ Lrika takiaseaseaseenaneli ki Tamatama; lrika tadrengedrengedrengeeraneli iniane;

² lri senadhaku drengedrengere ku tapiane ki Tamatama; ku kiadredredrepete ku umawmase lu kilalra ani kiraragai makanaelre.

³ Tupapalraili senai drengedrengere ku saniangane ki Tamatama; bwala takarededele pelaelaela drengedrengere ku naganeini!

⁴ Lu kitubiaku ki Tamatama, lri tara kilalra nakwane; palribulu nakwane pakidaili ki thekelrane patuelre.

⁵ Ku kiadredredrepete ka umawmase sudralrwa satalu iniane, lri ikai ku akiragadhane; kwi lalasu kai lri kasalivalrau palralrawthu.

⁶ Ku Tamatama kialalra ku kitubi ki pakulrulrulu ka kadrwa ku paralubu; palribulu liniane pakidaili ki akwalriane patuelre.

⁷ Ku lasasiakawlu ki Tamatama palakebe ki mwasakene mukuludru iniane ka umawmase, la palribulu liniane pakidaili ki matiamukuludru.

⁸ Kunumi ngikakamaniya kilrialringau ku tharirane ki Tamatama; ku satalu iniane ku umawmase mwaesai turamuru!

⁹ Savaeva ku kidremedreme ka kawkawlu ki Tamatama, musakena mukuludru ki Tamatama; ku mwasakene mukuludru iniane ku umawmase kadrwa ku akawramane sanaka manemane.

¹⁰ Adravane ka yacengecenge ka raiyungu lri mialri kawrame, kasilrau, ai ku kiasilape ki Tamatama ka umawmase ku amuesadhane patuelre kai lri akivalane.

¹¹ Latalragilragi ka yacengecenge, kilalra kai aiyaneli! Lri bulrwaku numiane musakena mukuludru ki Tamatama.

¹² Apia kirararagai numi ku tapanianianiakane numi? Apia kisupisupilri numi ku malragi si kiraragai ku niake?

¹³ Kwi lridame numi ani kai kawriva ku ngialisiane ku vaga; kwi bibiane numi la mialri madha katavuvuvulrucu.

¹⁴ Cilria ki ngialisiane la tupapalra ki mathariri, la kisamula kisilape ki rathudane.

¹⁵ Ku Tamatama siarapale ki madringelrese ka umawmase, la kilalra ku kitubi lini.

¹⁶ Ai ku Tamatama kiaecebe ki manganganga ka umawmase; kwi lalasu sana pacai kiakarimurunga ki umawmase.

¹⁷ Ku madringelrese ka umawmase lu kitubi ki Tamatama, kwi lasu kialaalra; Ku Tamatama palribulu liniane pakidaili ki akwalriane patuelre.

¹⁸ Ku Tamatama wadethe ki masulri ngupukwane ku kidremedreme ka umawmase; palribulu ki madula kababurau ku kidremedreme ka umawmase!

¹⁹ Ku madringelrese ka umawmase kiapadradresenge ku makaalra ku akwalriane, ai ku Tamatama pakiadaili liniane kikai patuelre.

²⁰ Ku Tamatama palakebe pailrepenge iniane, adravane ka navaevanga ka culrale lri kai kicelra.

²¹ Kai pasalrivane papacai ki manganganga ka umawmase; ku magirimucu ki madringelrese ka umawmase ku umawmase lri kipathavungu.

²² Ku Tamatama lri palribulu ki sasiakawluini; ku satalu iniane ku umawmase lri kai kipathavungunga.