Lasenai 33 - Ngudradreadrekadhane Ka Sisiu 魯凱語聖經

Sadrengedrengerane ka senai

¹ Madringelrese ka umawmase, papia ki Tamatama karaleale kiraragai; mapapedrenge ka umawmase, drengedrengera iniane.

² Patungutunga kiaseasene ki Tamatama, arakaiya ku sapasenasenadhane drengedrengere iniane.

³ Papia iniane senai ku bavane ka senai; kalrigila patungutungu, si akwadrau senai!

⁴ Ku vaga ki Tamatama patengatengane; ku tapianeini asudralrwalrwane.

⁵ Ku Tamatama madalame ki dringelresane si aparamaramavane; ku kai akabalribalrithi ka sakialibakeini swaete ki kadaengane.

⁶ Kai subelebelenge Tamatama ka wadrekase ala kibekace; kai vai, dramare, latariau ngwakai ki vagaini si kibekace.

⁷ Wamalra elrelre ki laveke si pataelre; la malra ki laveke pudringai pikai adringi ki drawsulu.

⁸ Kai kawmasane patuelre lri musakene mukuludru ki Tamatama! Kai kawmasane kai umawmase makanaelre lri musakene mukuludru iniane!

⁹ Ku Tamatama sa avavaga yakaai kai kawmasane; sadrekase yakaai sanaka manemanenga.

¹⁰ Ku Tamatama lri paamaki ku tamadrekadrekasane ki sanaka kuni; ku tamadrekadrekasane ki sanaka umawmase kadrwa ku ngiamia.

¹¹ Ku apangimiane ki Tamatama lri ikai palralrawthu; ku takidremedremedremaneini kai lri kaela lwigaigaigane.

¹² Ku mwasakene ki Tamatama si tu Twaumase iniane ka kuni lri kaesai turamuru! Ku pilrini si kainganai aumawmaseini ka laumawmase lri kaesai turamuru!

¹³ Ku Tamatama twalai ka belenge paswa lebe drele, wadrele sanaka umawmase.

¹⁴ Twalai ki taetalaneini masiasirare drele kai ki yakai kawmasane ka laumawmase.

¹⁵ Wadarepe ku takidremedremane ki sanaka umawmase, la thiingale ku tatumanane lini patuelre.

¹⁶ Ku talialalai kai lri satalu ki takalra si sapukwane ka lakwapingi si akaci; ku kwapingi lai kai singikai ku pukuini si akaci.

¹⁷ Ku satalu ki sakikaruburuburane ka rigi lri tara akaaci kaidu lri maka iya; ku puku ki rigi kai lri maka dulru palribulu ki umawmase.

¹⁸ Ku Tamatama siarapale ki mwasakene mukuludru iniane ka umawmase; siarapale kudra satalu ki sakialibakeini ka umawmase.

¹⁹ Palribulu liniane pakidaili ki apacadhane, luka kalasilravane paudripi ku niake lini.

²⁰ Lri sudralru nai satalu ki Tamatama; ku Tamatama yai amani ku paralubu naiane, tarapalakebe naiane.

²¹ Kai kidremedreme nai swaete ku sakiaragai, asi lwiyane satalu nai ku saniange ka naganeini.

²² Tamatama, swadralru nai satalu muswane; ku sakialibakesu ani ikai tapalra naiane.