Lasenai 32 - Ngudradreadrekadhane Ka Sisiu 魯凱語聖經Ngiapapelaela ku pasalrivane si kiapacepe Tusenai ki Davidi ka sabulrwane ka senai. 1 Ku kiapacepe ku pasalrivane ku umawmase, kwi lasu mwaesai turamuru! 2 Ku kadrwa ku tavuvulrucane ku kidremedreme, si kai kitupasalrivane ki Tamatama ku umawmase, kwi lasu mwaesai turamuru! 3 Lu iceelrebaku kai pelaela ku pasalrivaneli, waawngaku tubi, si kidulrunga kai kinawmasane si kidremedremeli! 4 Tamatama, lukavaiyane lukamaungu pathavungusu nakwane; la kidulrunga naku si kakadrwanga ku pukuli, mia ki twalalau luka kaladralrangedrangane. 5 Ala kamani, ku papiali muswane ngipapelaela ku pasalrivaneli; kainaku wasekete ku tapasalrivaneli. Malrithethaku ku papia muswane pelaela patuelre ku pasalrivaneli, la pacepesu ku tapasalrivaneli patuelre. 6 Ngwalai kikai, ku tengatengane ka kiasususu makanaelre saka adulrudulrwaneana silape muswane lri papia muswane kitubi; lu lriaunga ku acilai, lai lri kai murenere si kamudu. 7 Amanisu ku tamwaneli kilepenge; lri tara palribulusu nakwane pakidaili ki amatikurwane. Lri akwadravaku senai drengedrengere ku tapalribulanesu, asi lwiyane palakebesu nakwane. 8 Ku Tamatama amia kai: Lri pelaelaku ku lrika angukaiyanesu ku kadalranane; lri bulrwaku muswane, si katapakipapawlringaavane muswane. 9 Madha ngialralrau ki ngiririgi ka kadrwa ku thingale, lu arakaiyane ku satametamengane si sacucuane si ruthuku kialalra. 10 Ku manganganga ka umawmase lri tara kipadradresenge ku makaelaela ku akwalriane; ku satalu ki Tamatama ka umawmase lri kikilringulu ki kialibake iniane. 11 Madringelrese ka laumawmase, ngwaladha ku takaungane ki Tamatama si kiraragai; ku madringelrese ka laumawmase, karaleala kiraragai makanaelre. |