Lasenai 31 - Ngudradreadrekadhane Ka Sisiu 魯凱語聖經

Satalu ka inulri

Tusenai ki Davidi. La baai ki tarasangililuku ki sikatai.

¹ Tamatama, kiatubiaku ku apalakebanesu; kiatubiaku muswane madha pamakimaki nakwane palralrawthu. Kusu yai aparamaramausu ka Twaumase; kiatubiaku muswane palribulaili!

² Kilalra kai kitubili, la makakaai palribulu nakwane! Kamania ku tamwaneli kipalakebe la palakebe nakwane, kamania ku nikepalane ka cekeleli si palribulu nakwane.

³ Amanisu ku tamwaneli kipalakebe, ka nikepalane ka cekeleli; kiatubiaku singikaiya ku pukawnungasu si ililuku nakwane.

⁴ Kiatubiaku muswane pamuberaili ki lri tulilisi nakwane ka lravathe, asi lwiyane amanisu ku tamwaneli kipalakebe.

⁵ Kai abakeli lri baadhaku pikai ki alrimasu; Tamatama, amanisu ku twakapatengatengane ka Twaumase, lri palribulusu nakwane.

⁶ Mavalracevacaku ku wasukubu ki kaika patengane ka twaumase; ai satalwaku muswane.

⁷ Ngwalai ki kai akabalribalrithi ku sakialibakesu, lri kiraragadhaku turamuru. Wadrelesu kai sakwalrialrili; wathingalesu kai pakakucingacingalreli.

⁸ Kaisu pawalrabuku nakwane pikai ki alrima ki badha; wamalrasu nakwane pikai ki asutelraadhane ka taikaiyane.

⁹ Tamatama, kiatubiaku muswane arakaiya ku sakialibake marasikai nakwane, asi lwiyane kiapadradresengaku ki akwalriane; kai macali mabitiri ngwalai ku tatubiane, la suludrunga si ngikurwane kai kinawmasane si kidremedremeli.

¹⁰ Kai sakwalrialri ki kidremedremeli pakalrubainga ki niakeli; kai adirivanane ki kidremedremeli la aru tuedrekane ki cailili. Kai akwalriane patwaramuru nakwane; kai culraleli marudamenga patuelre.

¹¹ Ku labadha makanaelre twameameameelrace nakwane, ku lapasiagiagisi la ulralralrakai nakwane; adravane kudra lakatalragianeli mialri mukuludru nakwane; kwi lalasu lu ikai ki kadalranane ki cekele kipadradresenge nakwane mawabebere makanaelre.

¹² Marimurunga nakwane makanaelre, tuwapacainga ka umawmase nakwane; miaku ki nicilrianenga ka kadrwa ku paluludane ka lamanemane.

¹³ Kialalraku ki badha takaalra ku matetetenge, kai ngiathalringulu swaete ku matiaukuludrane! Kwi lalasu madrekadrekase ku lrika atulisiane nakwane, lri papacai nakwane.

¹⁴ Ai, Tamatama, satalwaku muswane; amanisu ku Twaumaseli.

¹⁵ Lri palralrawthaku kisirapale muswane; kiatubiaku muswane pakidailaili ki labadha si lri kabebetethe nakwane ka umawmase.

¹⁶ Kiatubiaku muswane arakaiya ku sakialibake marasikai ki sasiakawlusu; yakai muswane ku kai akabalribalrithi ku sakialibake, kiatubiaku muswane palribulaili.

¹⁷ Tamatama, papiaku muswane kitubi; kiatubiaku muswane madha pakasalivalravalrau nakwane. Ku tangangangace ka umawmase ani amaki; kwi lalasu ani kameteemetenga si mwa ka swadriadringi.

¹⁸ Asu tamenge ku ngudwi ki lataratavuvuvulrucu; ku la wadradrarane, wabusabusabusu, lu avavaga la tulisi ki madringelrese ka umawmase ani kai maka avavaganga.

¹⁹ Ku pasikaisu ki mwasakene mukuludru muswane ka umawmase pudringai ku mathariri ka lamanemane makalra turamuru! Palakebesu ki wakela satalu muswane ka umawmase; ku piasu ikai cucubungu ki yakawmasane ka umawmase mathariri turamuru!

²⁰ Wamalrasu liniane pudringai pikai cucubungu muswane ki asutelraadhane ka taikaiyane, amani lu kipadradresenge ku akitulisiane ki walepenge liniane; wamalrasu liniane sekete pikai ki mathariri ka taikaiyane, amani lu kitusinalrelreme ki labadha.

²¹ Drengedrengera ki Tamatama! Sa lringulu nakwane kikaruburu, ku Tamatama pathingale nakwane ku kai maelaela ku sakialibakeini.

²² Kai kidremedremeli malrikilriki la mukuludru, alau wacilringasu nakwane amiaku; ai sapapiaku muswane kitubi ku akiparalubane, kialalrasu kai kitubili.

²³ Patengatengaane ka kawkawlu ki Tamatama, musakena kilibake ki Tamatama. Ku Tamatama palakebe ki masalru kapatengatengane ka kawkawlu, la pangicaeme pathavungu ki ngiakalrilrigu ka umawmase.

²⁴ Ku swadralru satalutalu ki Tamatama makanaelre, kunumi yai kakecenga, si kagarange!