Lasenai 30 - Ngudradreadrekadhane Ka Sisiu 魯凱語聖經

Kiaseasene ka inulri

Tusenai ki Davidi. Saarakaikaiyane lu patarumara ku daane ki Twaumase.

¹ Tamatama, wadrengedrengeraku muswane, asi lwiyane palribulusu nakwane, la kaisu palraingi ki badha papia nakwane dradrarane.

² Tamatama ka Twaumaseli, kiatubiaku papia muswane ku akiparalubane, la sulrawsu si pawdringai nakwane.

³ Tamatama, patwalaisu swadriadringi bilibili palribulu nakwane; kaisu pamudaane nakwane swadriadringi.

⁴ Kunumi ka tengatengane ka kawkawlu ki Tamatama, drengedrengera ki Tamatama; kunumi yai kiaseasena ku takaungane ki sanianiangenga.

⁵ Ku lisianeini yasasane si kawlrau; ai ku migemini kai lri isadranga ikai ki tapanianianiakane. Lukamaungu ku lrese mwalwaludru, ai, lukamialrealre la kirararagai.

⁶ Swateelradhaku si iya kai: Lri kainaku lrudralrudrai palralrawthu.

⁷ Tamatama, kialibakesu marasikai nakwane, la kapapedrengaku, mia ki acegecege kapapedrenge ikai lregelrege ka nikepalane ka cekele. Ai lu kidailisu si kai thethengete nakwane, kiarimwaku kakiwcu turamuru.

⁸ Tamatama, papiaku muswane kitubi; kiatubiaku muswane paralubaili:

⁹ Lu pacadhaku manemane ku amusadhane? Lu mwadringinga naku ki balriu yakai ku manemane ku akaesadhane? Ku wapacai ku umawmase wadulru drengedrengere muswane? Kwi lalasu lri dulru pelaela pasalraelre ku takapatengatengananesu?

¹⁰ Tamatama, kilalra, si kakalitha nakwane! Tamatama, kiatubiaku muswane paralubaili!

¹¹ Ku tubili pakabalrithisu paakiragadhane; ngwalrasu ku atubianeli, si pasilaimai nakwane ku sakiaragai.

¹² Lakamani kainaku lri iceelrebe, lri senadhaku drengedrengere muswane; Tamatama ka Twaumaseli, lrika palralrawthaku kiaseasene muswane.