Lasenai 28 - Ngudradreadrekadhane Ka Sisiu 魯凱語聖經

Kiatubi ku akiparalubane ka inulri

Tusenai ki Davidi.

¹ Tamatama, lri papiaku muswane kitubi; kusu ka tarapalakelakebe nakwane! Kiatubiaku muswane kilalra. Lu kaisu pulringalringau nakwane, lri tupapalraku ki lri kamudu ka umawmase kipadradresenge ku thadalrane ku amulisiane.

² Kilalra, papiaku muswane kitubi ku akiparalubane! Kilalra, wacucubungaku ki daanesu cidingi kai alrima kitubitubi.

³ Madha pataelrelre nakwane ki manganganga ka umawmase tupasalrivane, pataelre ki tangangangace ka umawmase amudu. Kilakikai umawmase lu kawriva mathaariri ku vaga, ai ku kidremedreme swaete ku lisiane.

⁴ Kiatubiaku muswane kaelaela kwi kakwakudhane lini, la pathavungu kwi ngangacane lini; kiatubiaku pathavunga kwi kanganganga lini, singikaiya ku naika akipangimiane lini cugu liniane.

⁵ Asi lwiyane kwi lalasu twadrekase ku takaungane ki Tamatama, la sidreadrekase ku tabekacaneini; lakamani, ku Tamatama lri pathavungu liniane, si palralrawthunga amudu liniane.

⁶ Ku Tamatama ani malra ku akidrengedrengerane, asi lwiyane kialalra ku takitubianeli ku lingau.

⁷ Ku Tamatama palakebe nakwane, sirapale nakwane; lri savaevanga kai kidremedremeli satalu iniane. Paralubu nakwane, ala kiragadhaku; lri senadhaku drengedrengere iniane.

⁸ Ku Tamatama palakebe ki kawkawluini; siarapale palribulu ki pilrini si cegecege ka talialalai.

⁹ Tamatama, kiatubiaku palribula ki kawkawlusu, la patarumara baai ki umawmasesu ku akaesadhane. Kiatubiaku lapwa liniane, si sirapale liniane palralrawthu.