Lasenai 27 - Ngudradreadrekadhane Ka Sisiu 魯凱語聖經

Wadrengedrengere ka inulri

Tusenai ki Davidi.

¹ Ku Tamatama yai ledrali, takipalribulribulaneli; lri mukuludrwana naku ki aneane? Ku Tamatama yai takilakebane ki niakeli; manemaneana ku amukuludraneli?

² Ku manganganga ka umawmase lu kikaruburu nakwane, si lri papacai nakwane, kwi lalasu mwacucusu si tubakebake makanaelre.

³ Adravane ka takaalra ka lakwapingi ku walringulu nakwane, lri mialriaku kai kakiwcu; adravane lepenge si kikaruburu nakwane ku badha, lri satalwana naku ki Twaumase.

⁴ Vaeva ku apapianeli kitubi ki Tamatama; kathane kikai vaeva ku sidramadramali: Amani kudra lrika aikaiyaneli ki daane ki Tamatama kai tapanianianiakaneli, ikai ki daaneini si dredredrele ku thariraneini, kitubitubi ku akililukane iniane.

⁵ Lu kipadradresengaku ku akwalriane, palakebe nakwane; ikai ki Alrivilrivi ka balrawbau pakasulivate nakwane. Paswatelrai nakwane pikai belenge ki makecenge ka alrisapesape.

⁶ Ngwalai kikai, lri pamalebeaku ki ngiathalringulu ka labadha. Lri ikaiyaku ki daaneini kiraragai patarumara; lri senadhaku drengedrengere ki Tamatama!

⁷ Tamatama, kiatubiaku muswane kilalra kai kitubili! Kiatubiaku muswane kakalithaili, tubalreaili!

⁸ Amiasu kai nakwane: Mwaili kikai. Tamatama, lri kisilapaku muswane;

⁹ kiatubiaku muswane madha kilepelepenge si kai pulrialrialringau nakwane! Kiatubiaku muswane madha kalisilisi, si pakatwase ki sasiakawlusu; takamanianesu ku taraparaluralubu nakwane. Palribulu nakwane ka Twaumase, kiatubiaku muswane madha cilricilri nakwane.

¹⁰ Adravane cilri nakwane ku marudrawdrangeli, ku Tamatama lri sirapale nakwane.

¹¹ Tamatama, kiatubiaku muswane pelaela ku lrika angukaiyaneli ku kadalranane; asi lwiyane takalra kai badha kai walelelepenge nakwane, kiatubiaku muswane arakaili ngukakai ki masadrarate ka kadalranane.

¹² Kwi lalasu arakai ku tavuvulrucane kikaruburu nakwane, kukuludru nakwane; kiatubiaku muswane madha pikaikai nakwane ki alrima lini.

¹³ Masalrwaku, ikai kai ki tapanianianiakaneli lri drelaku ku tharirane ki Tamatama.

¹⁴ Satalwa ki Tamatama! Sapukwana si kagarange! Satalwa ki Tamatama!