Lasenai 26 - Ngudradreadrekadhane Ka Sisiu 魯凱語聖經

Inulri ki makalecege ka umawmase

Tusenai ki Davidi.

¹ Tamatama, kiatubiaku pelaela ala ka kadrwa ku pasalrivaneli, asi lwiyane makalecege kai tangivelevelaneli, la pakaelreaku satalu muswane.

² Tamatama, kiatubiaku muswane drelaili, la kilrialringau nakwane; kiatubiaku muswane drela kai takidremedremaneli.

³ Ku kai akabalribalrithi ka sakialibakesu warake nakwane; ku takapatengatengananesu pakela kaikameane ka tasangililukane nakwane.

⁴ Kainaku wamwamwa ki ngiakathaithaitharirane ku takaumawmasane, la kainaku kirederedelane ki langiakathaithaithariri ka umawmase.

⁵ Mavalracevacaku sipalra ki pasalrisalriu ka umawmase, la kidailaku ki tangangangace ka umawmase.

⁶ Tamatama, tawalrimaku tusapelaelane ka kiadralrilaku, si la ngithalringulaku ki tapatarumaramarane sukubu muswane.

⁷ Wasenadhaku ku sakiaseasenane ka senai, si pelaelaela patuelre ku matisamaliane ku takaunganesu.

⁸ Tamatama, madalamaku ku taikaiyanesu ka daane; madalamaku ku taikaikaiyane isadra ki lrigusu.

⁹ Kiatubiaku muswane madha pakarederedele nakwane ki pasalrisalriu ka umawmase amudu; kiatubiaku madha pakaredededele nakwane ki papacai ki umawmase pacai.

¹⁰ Kwi lalasu kai wasusu ku akangangane, la mwa kidruanga alra ku pavangalre.

¹¹ Ngukai nakwane, kai kakudhaneli makalecege; kiatubiaku muswane kakalithaili, la palribulu nakwane!

¹² Kiadailinga naku patuelre ki matiamukuludru; lri ikaiyaku ki tayelrelreane ki mapapangale si senai drengedrengere ki Tamatama.