Lasenai 25 - Ngudradreadrekadhane Ka Sisiu 魯凱語聖經

Kiatubi ki Tamatama ku akililukane si kipalakebe

Tusenai ki Davidi.

¹ Tamatama, lri papiaku muswane patarumara kai inulrili;

² Twaumaseli, lri satalwaku muswane sikakathane. Kiatubiaku muswane madha pamakimaki nakwane si pakiarubwane, madha paakacikaci ki badha si papia nakwane putaritariri.

³ Ku satalu muswane ku umawmase lri kai kipamalebe; ku kiapamalebe amani kudra la kadrwa ku upakai si la baebalre muswane ku umawmase.

⁴ Tamatama, kiatubiaku muswane bulrwaili ku kadalrananesu, ku tangukaiyanesu bulruaili.

⁵ Kiatubiaku muswane ililukaili ngukakai ki patengane ka kadalrananesu, asi lwiyane amanisu ku palribulu nakwane ka Twaumase; lukavaiyane lukamaungu satalwaku muswane.

⁶ Tamatama, kiatubiaku muswane ngulringava ku thalradhanesu, ngulringava twalai kunadruma pakelanga kai, ku nipathingalanane ku kai akabalribalrithi ka sakialibakesu.

⁷ Kiatubiaku muswane pacepa ku tapasalrivaneli saka lavavalakaku; Tamatama, kiatubiaku ngwaladha ki migemi si kai akabalribalrithi ka sakialibakesu si kakalithi ngulringau nakwane!

⁸ Ku Tamatama mathaithariringa, ka madringengelresenga; wabulru ki pasalrisalriu ka umawmase ku angukaiyane dadavace ku kadalranane.

⁹ Waililuku ki ngiatatwalebe ka umawmase ngukakai ki madringelrese ka kadalranane, la bulru liniane ku takidremedremaneini.

¹⁰ Ku Tamatama arakai ku patengatengane si kudra kai akabalribalrithi ka sakialibake ililuku makanaelre ki palululudu ku sakiketeketaneini si drekaseini.

¹¹ Tamatama, kiatubiaku muswane singikaiya ku pukawnungasu pacepe ki pasalrivaneli, asi lwiyane kai pasalrivaneli madrau turamuru.

¹² Sanaka mwasakene mukuludru ki Tamatama ka umawmase, ku Tamatama lri pelaela iniane ku lrika angukaiyaneini dadavace ku kadalranane.

¹³ Kwi lalasu lri kisupisupilri ku akaesadhane si akiragadhane; ku lagagane lini lri sutelrai cekecekele ikai kai ki kadaengane.

¹⁴ Ku Tamatama siatalragi ki mwasakene mukuludru iniane ka umawmase, si pelaela papia liniane ku sakiketeketaneini.

¹⁵ Tasudralrwanaku ki Tamatama; palribulu nakwane pakidaili ki sapapacai.

¹⁶ Tamatama, kiatubiaku muswane paswalrikudra drele kakalithi nakwane, kathalradhaili, asi lwiyane twaramuraku si tangeangea kwalrialri.

¹⁷ Kiatubiaku muswane mwalra kai thekelraneli patuelre, palribulaili pakidaili ki amatikurwane patuelre.

¹⁸ Kiatubiaku muswane kakalitha kai sakwalrialrili si matikurwaneli, la pacepe ki tapasalrivaneli.

¹⁹ Drela, kai takapangalane ki badhali; kai lalasu magirimucu turamuru nakwane!

²⁰ Kiatubiaku muswane palakebaili, palribulaili; kiatubiaku muswane madha pamalebelebe nakwane, asi lwiyane kiatubitubiaku ku apalakebanesu.

²¹ Kai takapatengatengananeli si muleceganeli ani palakebe nakwane, asi lwiyane satalwaku muswane.

²² Twaumase, kiatubiaku muswane palribula ki swa Iseraylri; kiatubiaku muswane pakidaila liniane ki amatikurwane patuelre!