Lasenai 24 - Ngudradreadrekadhane Ka Sisiu 魯凱語聖經Saniange ka talialalai Tusenai ki Davidi. 1 Kai kawmasane si kai yakai kawmasane patuelre Tamatamane; kai kadaengane si yakai belenge ki kadaengane sanaka manemane la mialri ka iniane. 2 Wacegecege ki kadaengane pikai belenge ki laveke, la pasutelrai ku karwalai ki kadaengane pibelenge ki kadravane. 3 Aneane ku yakai ku puku mubelenge ki lregelrege ki Tamatama? Aneane kulri dulru mudaane ki daane ki Twaumase? 4 Amani kudra mabula ku alrima alrivilrivi ku kidremedreme, kai wasukubu ki samiamiange, kai madraedrangelre kiketekete. 5 Ku Tamatama lri patarumara baai ku akaesadhane ki miyaiya kai ku umawmase; ku palribulu iniane ka Twaumase lri pelaela ka kadrwa ku pasalrivaneini. 6 Ku miyaiya kai ku umawmase kaiyanganai silape ki Twaumase, si kelanga mucucubungu ki Twaumase ki Yakubu. 7 Madrau ka lalrawlrawdru, nguelebana! Sidrumane ka lalrawlrawdru, nguelebana! Ku saniange ka talialalai lri mudaanenga. 8 Kikai saniange ka talialalai yai aneane? Amani kudra sapukwane ka Tamatama; kadrwa ku kaika pamalebeini lu kikaruburu ka Tamatama! 9 Maadrau ka lalrawlrawdru, nguelebana! Sidrumane ka lalrawlrawdru, nguelebana! Ku saniange ka talialalai lri mudaanenga. 10 Kikai saniange ka talialalai yai aneane? Ku Tamatama ka abebeelengenga ki sanaka kwapingi, amani ku saniange ka talialalai! |