Lasenai 22 - Ngudradreadrekadhane Ka Sisiu 魯凱語聖經

Kitubi ki kwalrialri si senai ki kiaseasene

Tusenai ki Davidi. La baai ki tarasangililuku ki sikatai. Ku lingau arakai ku “Malialiare ka lrulai ka salawngane”.

¹ Twaumaseli! Twaumaseli! Asu cilri nakwane? Lu karalealaku kitubi ku akiparalubane, asu kai kela paralubu nakwane?

² Twaumaseli, maralealealaku lukavaiyane, la kaisu tubalre; lukamaungu la kitubiaku, la mialri ka kadrwa ku taaseasanane.

³ Ai, kiamusakenesu ka amani ku sanianiangenga, amanisu ku drengedrengedrengere ki swa Iseraylri.

⁴ Ku cucungulane nai satalu muswane; kwi lalasu lu satalu, la palribulusu liniane.

⁵ Kwi lalasu lu papia muswane kitubi, la kidaili ki akwalriane; kwi lalasu lu satalu muswane, kai masulrisulri.

⁶ Ai, kainaku ngiaumawmasenga; miaku ki lubalubai, kisidreadrekase kimulralrakai ki laumawmase.

⁷ Sanaka wadrele nakwane ku umawmase mwalralrakai nakwane makanaelre, si lrialridame vetevete ku awlru lini iya kai:

⁸ Lu satalusu ki Tamatama, ani kai kela palribulu muswane? Lu kadalame muswane ku Tamatama, ani kai kela paralubu muswane?

⁹ Tamatama, pakasulivatesu nakwane kitulalake; saka dainianaku, palakebesu nakwane pakasulivate.

¹⁰ Sakitulalakaku satalwaku muswane; sautaluvaivadhaku mukawmasane, amanisu ku Twaumaseli.

¹¹ Kiatubiaku muswane madha daidaili nakwane! Sana kela ku amatikurwane, kadrwa ku amwaneli kiparalubu.

¹² Takaalra ku badha ku mia ki lasawvalai ka lwange lringulu nakwane; kwi lalasu mia ki malilisi ka sawvalai ka lwange ki Basane lringulu kikaruburu nakwane.

¹³ Kwi lalasu mia ki wagirigiringi ka laraiyungu, la manunganga si thamukulu lrede nakwane.

¹⁴ Kai pukuli mia ki acilai ka nigugwane pucakena si kawlrau. Kai culraleli la katatuluthunga; kai kidremedremeli mia ki rusuku ngiderenau ikai taliadringi nakwane.

¹⁵ Kai lrulrunguli mia ki dae ka thuvugu kameameale, kai lridame swadakipi ikai ki lelrethe. La pikaaiyanasu nakwane ki dae ka thuvugu mukalavalava ki apacadhane.

¹⁶ Ku lamanganganga yaelrelre si lringulu nakwane, mia ki makalrakalra ka talilisi ka tawpungu upupungu nakwane; kwi lalasu wathirace ki alrimali si drapaleli.

¹⁷ Waasipinga madu kai laculraleli; ku labadhali la dradrarane lu drele nakwane.

¹⁸ Kwi lalasu mavalavala ku sapakabelengane ku laimaili, la ngwalai ki sapakadriadringaneli kuzibiki.

¹⁹ Tamatama, kiatubiaku muswane madha kidaili nakwane! Takipalribulribulaneli, bwala kirimwa palribulu nakwane!

²⁰ Kiatubiaku muswane palribulaili pakidaili ki dramu; kiatubiaku muswane palribula ki niakeli pakidaili ki talilisi ka latawpungu.

²¹ Kiatubiaku muswane palribulaili patwalai ki ngudwi ki laraiyungu; lu ikaiyaku cucubungu ki yaubulane ka lalwange kadrwa ku paralubu nakwane!

²² Lri papiaku ki lasakacekeleli pelaelaela ku takaunganesu; lri ikaiyaku ki tayelrelreane lini si senai drengedrengere muswane:

²³ Ku mwasakene mukuludru ki Tamatama ka umawmase, senadha drengedrengere iniane! Lamwabaibalrithi ki Yakubu, lrigwa iniane! Laumawmase ka swa Iseraylri, musakena mukuludru iniane!

²⁴ Ku Twaumase kai siadrekase ki matiakukuru, kai marimuru ku sakwalrialri lini; kai wacilri liniane, ngiabalre kamani si kilalra ku kitubi lini.

²⁵ Lri ikaiyaku cucubungu ki tayelrelreane ki laumawmase senai drengedrengere ku takaunganesu, ikai cucubungu ki mwasakene mukuludru muswane ka laumawmase patarumara ku kiketeketengali ku sapatarumarane.

²⁶ Ku matiakukuru ku umawmase lri kane si kabucuku makanaelre; ku wasilasilape ki Tamatama ku umawmase lri senai drengedrengere iniane makanaelre. Kwi kidremedreme ki lalasu ani kiraragai palralrawthu.

²⁷ Kai kawmasane sanaka kuni ani ngulringalringaunga ki Tamatama, si papia iniane tupapalra; sanaka zuku ani sukubu iniane.

²⁸ Ku Tamatama amani ku talialalai; warathudu ki sanaka kuni.

²⁹ Kai kawmasane sanaka ngiakalrilrigunga ka umawmase lri guruthungane ikai cucubungu iniane makanaelre; ku lri tara paacai ka laumawmase lri sukubu musakene iniane makanaelre.

³⁰ Ku mwabaibalrithi ka laumawmase lri kaungu pasikai iniane; sanaka umawmase lri papia ki mwabaibalrithi pelaelaela ku ngwakai ki Tamatama.

³¹ Kudra kaiyana kiatulalake lri kilalra ki umawmase ku amia kai: Ku Tamatama palribulunga ki kawkawluini!