Lasenai 21 - Ngudradreadrekadhane Ka Sisiu 魯凱語聖經

Wasenai drengedrengere ku taakaciane

Tusenai ki Davidi. La baai ki tarasangililuku ki sikatai.

¹ Tamatama, ku talialalai ngwalai ku tapatarumaranesu ku puku si kiraragai; ngwalai ku tapaakacianesu iniane si kiraragai.

² Pangiamiasu ku takidremedremaneini; palraingisu ku takitubianeini.

³ Patarwamarasu baai iniane ku kadrwa ku talikaiyane ka akaesadhane, la pasitawpusu iniane ku kingi ka pagamucu.

⁴ Kwi lasu lu papia muswane kitubi ku akalragiane ku niake, patarwamarasu baai iniane, la kalragi ku niakeini ka kadrwa ku alikaiyane.

⁵ Kwi lasu ngwalai ku taparalubanesu iniane si malra ku madrau ku lrigu; patarwamarasu baai iniane ku lrigu, ku kiwsakenane.

⁶ Ku baaisu iniane ku akaesadhane kadrwa ku palikaiyane; ku tatapalranesu iniane swaete ku sakiaragaini.

⁷ Ku talialalai satalu ki Tamatama; ngwalai ku kai maelaela ku sakialibake ki Abebeelengenga, ku puku ki takatalialaladhaneini lrika palralrawthu kapapedrenge.

⁸ Ku talialalai lri pwalra ki badhaini patuelre; lai lri ravase ki malisilisi iniane makanaelre.

⁹ Lu utaluvaivai kwi lasu yai, lri mia ki maculu ka apwi lama liniane. Ku Tamatama lri ikai ki elathane amudu liniane; ku lisiane ka apwi lri lama utu liniane.

¹⁰ Ku talialalai lri amudu ki agagane lini; kwi lasu lri papacai ki mwabaibalrithi liniane.

¹¹ Kwi lalasu madrekadrekase ku akabebetethane iniane, ai kai lri maka ngimia.

¹² Kwi lasu lri bilakace ku bu si kilengelenge pwa lraili, lai lri ngibangulu kwi lalasu lailai mubere.

¹³ Tamatama, paadrelana ku pukusu! Lri drengedrengere nai senai ku madrau ka pukusu.