Lasenai 2 - Ngudradreadrekadhane Ka Sisiu 魯凱語聖經

Pilri ki Twaumase ka talialalai

¹ Kai lakuni ani kisanu karivurivu? Kai laumawmase ani madrekadrekadreekase ku kaika patengatengane?

² Ku latalialalai lini maredededele kainganai; ku lakiacapili ki kuni taelre mapelaelaela, lri kikaruburu ki Tamatama si pilrini cegecege ka talialalai.

³ Kwini lalasu amia kai: Takalrabuthu ki sakerengane lini! Bwala tabalre ki tarathudane lini!

⁴ Ku Tamatama twalai belenge ki taetalane mulrakai; mwalrakai ku kulrungane kai ki laumawmase.

⁵ Yakai ki elathane pakipapawlringau liniane, yakai ki lisiane pangituluku liniane si kai thingale ku apiane.

⁶ La iya kai: Ikai Ziyungu belenge ki saniange ka lregelregeli, pacegecegaku kudra pilrili ka talialalai.

⁷ Kudra talialalai amia kai: Lri pelaelaku kai drekase ki Tamatama. Ku Tamatama amia kai nakwane: Lalakeli muswane; kaikameane atamanga naku muswane.

⁸ Lu kitubisu, lri patarumaraku baai muswane kai lakuni; kai kawmasane patuelre lai lri ka musuanenga.

⁹ Lri arakaisu ku ukudru ka adreme rathudu liniane; lri tatuthirisu liniane, mia ki watatuthiri ki dilrungu.

¹⁰ Latalialalai, dradrela! Lawarathudu ki kuni, kilalra kai sapakipapawlringavane!

^11-12 Arakaiya ku mukuludrane musakenane ku kidremedreme sukubu ki Tamatama, mwakuludru madu, si guruthungane ikai cucubungu iniane; amani lu mia ki apwi ka tariau ku ridarane lu kaelaela, lai lri makakaai numi pacai! Kudra papia iniane kitubi ku akipalakebane ku umawmase lri kaesai turamuru!