Lasenai 19 - Ngudradreadrekadhane Ka Sisiu 魯凱語聖經

Lrigu ki tabekacane ki Twaumase

Tusenai ki Davidi. La baai ki tarasangililuku ki sikatai.

¹ Kai subelebelenge peaelaelaela ku lrigu ki Twaumase! Kai lepawngane la pasalraelrelre pelaela ku takaunganeini!

² Luka vaivaivaai matiakaikai, lukamaungu la pasalraelrelre pelaela;

³ kadrwa ku vaga kadrwa ku sapelaelane, kadrwa ku lingau kadrwa ku marariau.

⁴ Ai, ku matiakai liniane ku vaga salraelre kawmasane; ku vaga lini wadaruru sanaka inunga. Ku Twaumase yakai subelebelenge pasikai ki vai sapa ku balrawbau;

⁵ ku vai mia ki warakerakete ka sawvalai ka mwalatalatadre ki tapeapecane, mia ki garagarange ka walailailai kiraragai.

⁶ Twalai subelebelenge talikai kai ngibwale, la ngithalringulu papia talikai kavai; ku culwaneini salraelre mwa sanaka manemane.

Hulrice ki Tamatama

⁷ Ku hulrice ki Tamatama kiatulrepenge, pakabavane ki kidremedreme ki umawmase; ku drekase ki Tamatama asudralrwalrwane, wadulru kalrigili ku makulrungu ku umawmase.

⁸ Ku tukakudhane ki Tamatama aparamaramau, la kiragai ku paluludu ku umawmase; ku sabulrwane ki Tamatama pacengecenge, paledra ki kidremedreme ki umawmase.

⁹ Ku takelretane tukakudhane ki Tamatama tengatengaane, lri ikai palralrawthu; ku taturingaringavane ki Tamatama ngiamiya, si aparamaramau.

¹⁰ Ki lakikwini makuciacingalre ki kingi, walribate ki kakingiane; malimememe ki valu, walribate ki kavalwane.

¹¹ Kilakikai pakiapapawlringau ki sasiakawlusu; lu paluludu ku sasiakawlu, ku amuesadhaneini kadrwa ku apalikaiyane.

¹² Aneane ku wadulru ngidradrele ku tapasalrivaneini? Pacepa kikai kaika ranauli pasalriu.

¹³ Madha paranau nakwane pasalriu, madha palrailraingi ki pasalrivane marasikai nakwane. Luka ngimiyaiya kikai, lri dulrwaku ka amani kudra kadrwa ku pwalane ka umawmase, si kai pasalriu ku wabaebalre ka madrau ka pasalrivane.

¹⁴ Tamatama ka takilakebaneli, ka takipalribulaneli, kai vagali, kai kidremedremeli ani kitarumara si kikiragai muswane patuelre.