Lasenai 18 - Ngudradreadrekadhane Ka Sisiu 魯凱語聖經

Senai sa akaci si kelakela ku Davidi

Saka vai kwini ku Tamatama palribulu ki sasiakawluini ka Davidi kalrabuthu ki alrima ki Saule si drumane ka badhaini, ku Davidi papia ki Tamatama senai kikai senai kai. La baai ki tarasangililuku ki sikatai.

¹ Tamatama, amanisu ku pukuli; mwasakenaku kilibake muswane turamuru!

² Ku Tamatama amani ku palakebe nakwane ka alrisapesapeli si kepaleli; ku Twaumaseli amani ku paidringi nakwane ka taikaikaiyaneli kilakebe, ka walakebe nakwane ka alathare, si palribulu ka pukuli ka tasakaikaiyaneli kikaruburu.

³ Papiaku ki swadalepe kidrengedrengere ka Tamatama kitubi, la palribulu nakwane pakidaili ki badha.

⁴ Ku calrisi ki apacadhane walrepelrepe nakwane; ku carungucungu ki akamudane walrudrulu nakwane.

⁵ Ku calrisi ki swadriadringi walrepelrepe nakwane; ku lravathe ki tadralredralrekane mwakalavalava nakwane.

⁶ Lu ikaiyaku ki akwalriane kitubi ki Tamatama; kiatubiaku ku aparalubane ki Twaumase. Si patwalai ki daane ki Twaumase kilalra kai lingauli; ku kitubili ku akiparalubane ku lingau wadaruru ki calringaini.

⁷ Sakamani kwidra, kai kadaengane ngiavelevele; la tedretedrese kai tangadrane ki lalregelrege, asi lwiyane ku Twaumase maelaelaela.

⁸ Ku ngungwaneini twaebebelre, ku ngudwi la kelrakelrabe si kudaladalai ku lrangele.

⁹ Ku Twaumase mwaelebe belenge, si ngikakamani mulebe; yakai ku makudremelre kaicelrenge ka ememe ikai tailebe ki drapaleini.

¹⁰ Ngwarigi ki Kirubime si ngipalapalai; ngwakai ki valrigi ka sapakepake karidare ngipalai.

¹¹ Ku Twaumase arakai ku dradrimitane ngipapaidringi; ku makucege ka ememe mailuku ku acilai ngithalringulu iniane;

¹² ku kananu, si lrangele ka apwi twalai cucubunguini ledra, walregese kudra ki makudremelre kaicelrenge ka ememe.

¹³ Ku Tamatama twalai ka belenge dreredrere; ku Abebeelengenga pwataluvaivai ku lingauini.

¹⁴ Ku Twaumase walraili si apasawvagavagai ki badhaini; palrikace si pathirakupu liniane.

¹⁵ Tamatama, sana kaelaelasu ki badha, si ikai ki lisianesu giringi liniane, ku daedae ki laveke adrelane, ku tangadrane ki kadaengane la mialri mutaluvaivai patuelre.

¹⁶ Ku Tamatama twalai kavai belenge tale ku alrima pwalra nakwane, la patwalai nakwane adringi ki acilai bilibili patamau.

¹⁷ Palribulu nakwane pakidaili ki alrima ki magarange ka badha, la pakidaili ki malisilisi nakwane ka umawmase, asi lwiyane kwi lalasu magagarange nakwane makanaelre.

¹⁸ Lu kipadradresedresengaku ku akwalriane, kwi lalasu kiakaruburu nakwane, ai ku Tamatama palakebe nakwane.

¹⁹ Waililuku nakwane pakidaili ki sapapacai; palribulu nakwane, asi lwiyane kialibake nakwane.

²⁰ Ku Tamatama ngwalai ki uleceganeli pangibilri nakwane, ngwalai ku takivuthaneli kitupasalriu la patarumara baai nakwane ku akaesadhane.

²¹ Pangiamiangaku ku kadalranane ki Tamatama; kadrwana ku tabaebalreaneli ki Twaumaseli.

²² Paluludaku ku hulriceini patuelre; kainaku wacilriana ku drekaseini.

²³ Wathingale ka kadrwa ku tapamamaneli; kiadailaku ki ngialisiane.

²⁴ Lakamani ku Tamatama singiakai ki uleceganeli pangibilri nakwane, asi lwiyane wathingale nakwane ka kiavuthaku kitupasalrivane.

²⁵ Tamatama, arakaisu ku patengatengane marasikai ki twakapatengatengane ka umawmase; arakaisu ku kiatulrepenge marasikai ki kiatulrepenge ka umawmase.

²⁶ Ku mabula, arakaisu ku bulane marasikai iniane; ku mangangace, twabadhasu drele iniane.

²⁷ Palribulusu ki ngiakuruane ka umawmase; la pulebesu ki ngiatatuabelenge ngikalrilrigu ka umawmase.

²⁸ Tamatama, padalaisu paledra ku tinakili; ku Twaumaseli pasiakai nakwane pakatwase ki dradrimitane.

²⁹ Wabaaisu ku puku ku adulrwaneli kikaruburu ki badha, si dulru baburuku ku satelengane lini ravadre.

³⁰ Kikai Twaumase, ku tatumananeini kiatulrepenge turamuru! Ku vagaini matiasudralru turamuru! Mia ki vaeva ka alathare palakebe sanaka satalu iniane ka umawmase.

³¹ Kathane ku Tamatama, kadrwa ku drumane ku Twaumase; kathane ku Twaumase ka palakebe mitane ka alrisapesape.

³² Ku Twaumase patarwamara baai nakwane ku puku ka Twaumase; pakasulivate ki kadalrananeli.

³³ Pangiamia nakwane ki thadi pakapapedrenge ku tapudrapalane, ala dulrwaku ikai belenge ki lregelrege sutelrai acegecege.

³⁴ Pakiacawcakwane nakwane ku tapiapiane kikaruburu, ala dulrwaku bilakace ku makececengenga ka bu.

³⁵ Tamatama, wabaaisu nakwane ku sapalribulane ka alathare. Arakaisu ku vanale paralubu nakwane; ku tapalakebanesu pangiaradhekane nakwane.

³⁶ Pangwadrawsu ku kadalrananeli, la kakadrwana ku tangwadrekaneli.

³⁷ Lu saladhaladhaku ki labadha, la pwalraku liniane; lu kainaku pamalebe liniane, lri kainaku siwlri.

³⁸ Pamalebeaku liniane, kwi lalasu la kai maka acegecegenga; kwi lalasu twabakebake ikai cucubungu ki drapaleli.

³⁹ Patarwamarasu baai nakwane ku puku kikaruburu; la baaisu nakwane ku adulrwaneli pamalebe ki badhali.

⁴⁰ Pamwaberesu ki badhali; la pamudusu nakwane ki malisilisi nakwane ka umawmase.

⁴¹ Kwi lalasu makitwa makakaralealeale ku akipalribulane, ai kadrwa ku umawmase ku wadulru palribulu liniane; la papia ki Tamatama kitubi, ai kai twabalre.

⁴² Wababuravaku liniane, mia ki valrigi lu pasarau ki thuvugu; wadredreaku liniane, mia lu dredreane ki dae kadadalranane.

⁴³ Patwalaisu ki wabaebaebalre ka laumawmase palribulu nakwane, si cegecege nakwane ka amani ku abebeelengenga ki lakuni; ku maelane ka lazuku la makitu pasalaladhanga nakwane makanaelre.

⁴⁴ Kwi lalasu sana kilalra nakwane patwapapaalra; ku maelane ka zuku wakusangenga makanaelre ikai cucubungu nakwane.

⁴⁵ Kwi lalasu ngwalranenga ku garangane, la mukuludrunga takumanugiligiligili kainganai mulatadre ki takwapingane lini.

⁴⁶ Ku Tamatama palralrawthu panianiake, kunumi drengedrengera ki tarapalakelakebe nakwane! Ku Twaumase yai amani ku takipalribulribulaneli, kunumi pelaelaela ku takasanianganeini!

⁴⁷ Paakaci nakwane ki badha; la kusange nakwane sanaka zuku,

⁴⁸ la palribulu nakwane pakidaili ki badha. Tamatama, paakacisu nakwane ki badha; palakebesu nakwane pakidaili ki ngiakarakacane ka umawmase.

⁴⁹ Lakamani, lri ikaiyaku ki lakuni drengedrengere muswane; lri senadhaku drengedrengere muswane.

⁵⁰ Ku Twaumase tapaakacikaciyane ki cegecegeini ka talialalai; papia ki pilrini ka Davidi si mwabaibalrithi iniane putaluvaivai ku kai akabalribalrithi ka sakialibake.