Lasenai 17 - Ngudradreadrekadhane Ka Sisiu 魯凱語聖經

Inulri ki kiatupasalrivane capange

Inulri ki Davidi.

¹ Tamatama, kiatubiaku muswane kilalra kai kitubitubili ku aparamaramavane; kiatubiaku muswane kilalra kai kitubili, kilalra kai tengatengane ka inulrili!

² Kiatubiaku ku aputaluvaivadhanesu pelaela ka kadrwa ku pasalriwli, asi lwiyane wathingalesu kudra mwalecege lukamanemane.

³ Wathingalesu kai kidremedremeli, lukamaungu wakelasu drele nakwane; la pudriadringaisu kilrialringau nakwane, si kai maka kidringai ku ngialisiane ku takidremedremaneli.

⁴ Kainaku ngiamia ki palrapalra kawriva ku ngialisiane ku vaga; patwapapalraku ku drekasesu, si kai ngukaikai ku kadalranane ki malilisi ka umawmase.

⁵ Twapapapalraku ku tapudrapalanesu, kadrwana ku tathivalravalravane.

⁶ Twaumase, kiatubiaku muswane, asi lwiyane lri tara tubaalresu nakwane; kiatubiaku muswane kilalalra kai sasiadrudruruli.

⁷ Kiatubiaku muswane pathingalana ku matiasamali ku sakialibakesu si kainganai palribulu nakwane; satalwaku muswane, la maka dulrwaku mubere ki badha.

⁸ Kiatubiaku muswane palakebaili, mia lu ngipapalakebane ki maca madu; nau kilepenge ikai adringi ki sapakepakesu,

⁹ mubere ku akelane kikalisi tusinalreme ki tangangangace ka laumawmase. Kai badha swaete ku lisiane si lringulu nakwane;

¹⁰ makeelrathe ku kidremedreme lini, si paramuru lu kawriva.

¹¹ Lu papinwaku kidruanga, kai lalasu walriingulu nakwane; wasiasiasilape ku atakaiyane si lrudrulu patubakebake nakwane.

¹² Kwi lalasu mia ki raiyungu lri malra nakwane baburau, mia ki yacengecenge ka raiyungu kucucu ikai kadradridrimitane ukalavalava nakwane.

¹³ Tamatama, ngidrakala si kiecebe kikaruburu ki badhali, la ruthuku liniane! Kiatubiaku muswane arakaiya ku dramusu palribulu nakwane pakidaili ki tangangangace ka laumawmase.

¹⁴ Kiatubiaku muswane arakaiya ku pukusu palribulu nakwane pakidaili liniane, kamani kwidra la yakai kawmasane kaesaesaesai ka umawmase. Kiatubiaku muswane pangicaema pathavungu liniane; pangulwadhana ki lalalake lini ikai ki amatikurwane, si laputeedrana baai ki lalake ki lalalake lini.

¹⁵ Asi lwiyane mwalecegaku, lri dulrwaku kikawriva muswane; lu pacununga naku, ku tatapalranesu lri suete ki kidremedremeli ku sakiaragai.