Lasenai 16 - Ngudradreadrekadhane Ka Sisiu 魯凱語聖經

Satalu ka inulri

Tusenai ki Davidi ka nitukucingaalrane mia ki kingi.

¹ Twaumase, kiatubiaku muswane palakebaili, asi lwiyane satalwaku muswane.

² Amiaku kai ki Tamatama: Amanisu ku Tamatamali; amanisu ku tatwaladhane ki akaesadhaneli patueelre.

³ Ku savaeva ku kidremedreme papia ki Tamatama ka laumawmase saniangelriinga! Lu taelreane liniane amani ku makiraragaingali.

⁴ Kudra la twapapapalra ki drumane ka latwaumase ku umawmase wadawlu ki kadrwa ku apalikaiyane ka laamatikurwane; lri kainaku kipaelre liniane lutumane lu tulrisilrisi, lai kainaku lri sukubu ki latwaumase lini.

⁵ Tamatama, amanisu ku tatwaladhane ki akaesadhaneli patuelre; wagemegemesu kai niakeli.

⁶ Ku baaisu pakalreva mathariri turamuru! Ku baaisu nakwane ku kadaengane kiakadalame ki umawmase turamuru!

⁷ Lri drengedrengeraku ki Tamatama, asi lwiyane wabulru nakwane; lukamaungu, ku pugathimaneli pakasimeace nakwane.

⁸ Wathingalaku ka yakai cucubungu nakwane kai Tamatama; yakai thili nakwane, kainaku lri lrudralrudrai.

⁹ Lakamani, kiararagai kai kidremedremeli, kiararagai kai abakeli; kai kinawmasaneli la kathaithaithaariri kaliapapai;

¹⁰ asi lwiyane kaisu lri puswadriadringi nakwane, lai kaisu palraingi ki mwalecege ka sasiakawlusu padrele swadriadringi.

¹¹ Lri pelaelasu ku kadalranane ki niake nakwane. Ikai cucubungu muswane, swaete ku sakiaragaili; ikai thili muswane, yakai ku akaesadhaneli palralrawthu.