Lasenai 148 - Ngudradreadrekadhane Ka Sisiu 魯凱語聖經

Wadawlu ki lepawngane patueelre ku adrengedrengerane ki Twaumase

¹ Haliluya! Kunumi twaladha belenge drengedrengere ki Tamatama, ikaiya subelebelenge drengedrengere iniane.

² Ku lasasiakawluini belenge, kunumi drengedrengera iniane; ku lakwapingini belenge, kunumi drengedrengera iniane.

³ Vai, dramare, drengedrengera iniane; waledraedraedra ka sapakataleare, drengedrengera iniane.

⁴ La subelebelenge ka belenge, drengedrengera iniane; acilai belenge, drengedrengera iniane.

⁵ Sanaka maneemane patuelre drengedrengera ku nagane ki Tamatama! Ku Twaumase sana drekase, kiabekace patuelre,

⁶ sanaka maneemane swateelrai ku taikaiyane, palralrawthu kai lri akabalrithi; ku drekaseini kadrwa ku naneeanenga ku lri dulru baebalre.

^7-8 Ku maelaelane ka waudriwdripi ikai laveke, mwaadringi ka kadrwa ku taalikaiyane ka matiaukuludru, lrikace, kananu, pasabu, si ememe, si palululudu ku drekase ka maadrau ka valrigi; twaladha ki kadaengane drengedrengere ki Tamatama!

⁹ Latadradrau si tatitiki ka lregelrege, laivai ka angatu si angatungatu,

¹⁰ labulabulai lanilapulapwane, lalubalubai si lawavikavikalre langiapalapalai, kunumi makanaelre drengedrengera iniane!

¹¹ Latalialalai si sanaka umawmase, labetakane ki talialalai si lakiacapicapili ki kuni makanaelre,

¹² lalangukathathabarane si langitawvailelekete, latarudrawdrange si lalavavalake, kunumi makanaelre drengedrengera iniane.

¹³ Kwi lalasu makanaelre ani drengedrengere ku nagane ki Tamatama. Kathane ku naganeini ku kiausakene; ku lriguini walribate subelebelenge si kawmasane.

¹⁴ Ku Twaumase pangiaradhekane ki kawkawluini, ngwalai kikai, ku savaeva ku kidremedreme ka laumawmase ki swa Iseraylri, sanaka kadalameini ka umawmase wadrengedrengere iniane makanaelre. Haliluya!