Lasenai 147 - Ngudradreadrekadhane Ka Sisiu 魯凱語聖經

Wadrengedrengere ki wadulru sanaka manemane ka Twaumase

¹ Haliluya! Ala mathariri turamuru lu senaita si drengedrengere ki Twaumaseta! Lu drengedrengerane iniane matiakiragai turamuru, swadalepe turamuru!

² Ku Tamatama twapela Yerusalrime; wasarubu kainganai ki matwase acaicali ka swa Iseraylri.

³ Ku Twaumase wasulrau pawdringai ki matelrelrege ku kidremedreme ka umawmase, si cabu ki dula lini.

⁴ Wakelrete ku atathane ki latariau; la nguvavaeva sunagane liniane.

⁵ Ku Tamatamata saniange, wadulru sanaka manemane; ku lrigilaneini kaika amaka lekeleketane.

⁶ Ku Tamatama arakai ki ngiatatwalebe ka umawmase, la patubakebake pikai cakena ki mangangace ka umawmase.

⁷ Senadha kiaseasene ki Tamatama; patungutunga drengedrengere ki Twaumaseta.

⁸ Ku Twaumase wakabungu ara ememe subelebelenge; la paudale pakalreke ki kadaengane, ku laubulu la cebe ikai ki lalregelrege.

⁹ Ku Twaumase wabaai ku akaneane ki lawaudriwdripi, la lapu ki lalrulai ka talralreba.

¹⁰ Kai madalame ki sapukwane ka rigi; la kai murikai ki garagarange ka tarakikaruburu.

¹¹ Ai ku Tamatama madalame ki mwasakene mukuludru iniane ka umawmase, madalame ki masalru sudralru ki sakialibakeini ka umawmase.

¹² Yerusalrime, drengedrengera ki Tamatama! Ziyungu, drengedrengera ki Twaumasesu!

¹³ Ku Twaumase pakakecenge ki lrawlrawdru ki cekelesu; la subulrubulru ki lalalakesu.

¹⁴ Palakebe ki pagisanesu pakababitingi; ku Twaumase arakai ku mathaithariringa ka mugi lapu muswane.

¹⁵ Sana papia ki kadaengane drekase, ku vagaini makakaai pasalraelre.

¹⁶ Pwalebe ku mia ki ubale ki kiu ku pasabu; la sabulu ku mia ki thuvugu ka malubiri ka pasabu.

¹⁷ Wasabulu ku mia ki arululane ki enai ka kananu; kudra ipini ka mangangerece ka valrigi kadrwa ku umawmase ku wadulru telenge.

¹⁸ Ku Twaumase sana drekase, ku pasabu ngiaderenau; sana pavalrigi, ku acilai mwalwaludru.

¹⁹ Ku vagaini wabaai ki Yakubu, ku sabulrwaneini si hulrice wabaai ki swa Iseraylri.

²⁰ Ku Twaumase kai paiya kikai ki drumane ka kuni; kwi lalasu kai wathingale ku hulriceini. Haliluya!