Lasenai 146 - Ngudradreadrekadhane Ka Sisiu 魯凱語聖經

Wadrengedrengere ki tarapalribulribulu ka Twaumase

¹ Haliluya! Kusu ka rili, drengedrengera ki Tamatama!

² Ikai ki tapanianianiakaneli lri drengedrengeraku ki Tamatama; ku tapanianianiakaneli ikawmasane lri senadhaku drengedrengere ki Twaumaseli.

³ Kunumi madha satalutalu ki la tarasangililuku ikai kai kawmasane; madha kasalrusalru si satalu ki lri tara kaburau ka umawmase, kwi lasu lri kai maka palribulu numiane.

⁴ Kwi lalasu sana pacai lri asawlriane adae; kudra kikaikake lini lri ivaivaai alrapucu.

⁵ Kudra kiaparalubu ki Twaumase ki Yakubu ala yakai ku akaesadhane turamuru! Kudra satalu ki Tamatama ka Twaumaseini ku umawmase ala yakai ku akaesadhane turamuru!

⁶ Ku Twaumase wabekace subelebelenge, kadaengane, laveke, si yakai adringi sanaka manemane; ku Twaumase tapangimiane ku takiketeketaneini puvaga;

⁷ Pasiakai ki kiadredredrepete ka umawmase putaluvaivai ku dringelresane; la patarumara ku akaneane ki masilrasilrau ka umawmase. Ku Tamatama pangialralraingi ki kiaemenge ka umawmase,

⁸ la padrele ki mamukici ka umawmase. Ku Tamatama wadrakale ki kiadredredrepete ka umawmase; la kilibake taulra ki madringelrese ka umawmase.

⁹ Ku Tamatama palakebe ki mwababadhane ka umawmase; la paralubu ki lapakulrulrulu si lawalibakane, ai lri telenge ku la kikaikake ki manganga ka umawmase.

¹⁰ Ku Tamatama lri palralrawthu atalialalai! Ziyungu, ku Twaumasesu lri palralrawthu magagemegeme ku puku! Haliluya!