Lasenai 144 - Ngudradreadrekadhane Ka Sisiu 魯凱語聖經

Ku talialalai pasiakai ki taakaciane kiaseasene

Tusenai ki Davidi.

¹ Ku palakebe nakwane ka Tamatama ani kidrengedrengere! Pakiacawcakwane nakwane kikaruburu, si pakitwalrau nakwane ku akikaruburane.

² Ku Twaumase yai pukuli, kepaleli, ka takilakebaneli, ka takipalribulaneli; satalwaku iniane, si papia iniane kitubi ku akilakebane. La pamaki ki lakuni si pikai lebe ki drapaleli.

³ Tamatama, manemane ku apasiasipane ki umawmase, la kakalikaalithisu iniane? Kudra lri tara kaburau si kamudu ka umawmase manemane ku apasiasipane, la siraparaapalesu iniane?

⁴ Kwi lasu mia ki nikingivavalane manianiake sikakathane; ku caili si dramareini mia ki ngialribate si kawlrau ka alalingu.

⁵ Tamatama, kiatubiaku muswane mueleba subelebelenge, si ngikakamani mulebe; kiatubiaku muswane takela si sulrape ki lalregelrege, lani tuebebelre kwi lalregelrege.

⁶ Kiatubiaku muswane palrikaca, si pathirakupu ki labadha; kiatubiaku muswane lraila, kwi lalasu lani mawbebere!

⁷ Kiatubiaku muswane twaladha belenge si taale ku sapalribulane ka alrima, palribulaili, patwaladha adringi ki acilai bilibili pubelenge nakwane; palribulaili pakidaili ki singi latadre kela ka lamagarange ka badha;

⁸ kwi lalasu kai twakapatengatenganeana kawriva, adravane lu kiketekete watavuvulrucu.

⁹ Twaumase, lri papiaku muswane senai ku bavane ka senai; lri pawharepe drengedrengere muswane.

¹⁰ Paakacisu ki latalialalai, si palribulu ki sasiakawlusu ka Davidi.

¹¹ Kiatubiaku muswane palribulaili pakidaili ki la ngiakarakacane ka badha, palribulaili pakidaili ki singi latadre kela ka lamagarange ka badha. Kwi lalasu kai twakapatengatengatengane kawriva, adravane lu kiketekete watavuvulrucu.

¹² Ku sawvalai ka lalalake nai lu icengecenge ani mia ki ivai ka angatu ngicaeme ku tacebeane; ku lalabaibai ka lalake nai ani mia ki nikurukurane papacase ka ulrudru ka sapangiraeragelanane ki daane ki talialalai.

¹³ Ku drawsulu nai ani sueteeane, ka nipadulrwane ku makaelaeela ka taleke; ku lakiu nai ikai ki takivane ani tulalake tuthathatha.

¹⁴ Ku lalapulapu nai ani edhale tukalra, ka kadrwa ku la kialribate, kadrwaku la asawlra. Ki kadalranane ki cekele ani ka kadrwa ku lingau ku watubitubi!

¹⁵ Ku kiasupisupilri ku ngimiyaiya kikai ku kuni yakai ku akaesadhane turamuru! Ku mwasakene ki Tamatama ku laumawmase yakai ku akaesadhane turamuru!