Lasenai 143 - Ngudradreadrekadhane Ka Sisiu 魯凱語聖經

Kiatubi ku akiparalubane ka inulri

Tusenai ki Davidi.

¹ Tamatama, kiatubiaku muswane kilalra kai inulrili! Kiatubiaku muswane kilalra kai kitubitubili! Patengatenganesu, kiatubiaku muswane tubalreaili! Madringelresesu, kiatubiaku muswane paswalebea si pukawnu nakwane!

² Kiatubiaku muswane madha saibaibange nakwane ka sasiakawlusu, asi lwiyane ku yakai cucubungu muswane kadrwa ku nivuthane ka umawmase.

³ Ku badhali wavutha tulilisi nakwane, si pakitulreepenge pamaki nakwane. Kwi lasu waemenge nakwane pikai ki madradrimiti ka taememengane, miaku ki amani kudra maulainga pacai ka umawmase.

⁴ Ngwalai kikai, kainaku walremenga pikai ku sidramane; kai kidremedremeli watubitubi kasulringa.

⁵ Ngwalrialringavaku ku ngialribatenga ku vai; la kidremedremedreme ku kaungusu patuelre, si ngulringalringau ku piangasu ku awngane.

⁶ Papiaku muswane ciliki ku alrima inulri; akuliaku muswane, mia ki meameale ka kadaengane lu sidramadrama ki udale ka lame.

⁷ Tamatama, kiatubiaku muswane makakaiya kilalra nakwane; maulrawnga patuelre ku sidramaneli! Kiatubiaku muswane madha mubere nakwane si kai kirarakete nakwane; lu mia kwini, lri ngimiaku kudra ki lamwalrabuku ki apacadhane ka umawmase.

⁸ Kiatubiaku muswane katapangulringaavaili kudra sakialibakesu, asi lwiyane masalrwaku satalwaku muswane. Kiatubiaku muswane pelaelaili ku angukakaiyaneli ku kadalranane, asi lwiyane satalwaku swadralrwaku muswane.

⁹ Tamatama, papiaku muswane kitubi ku akipalakebane; kiatubiaku muswane palribulaili pakidaili ki labadhali.

¹⁰ Amanisu ku Twaumaseli; kiatubiaku muswane bulrwaili ku apaluludaneli ku takidremedremanesu. Kiatubiaku muswane kakalitha marasikai nakwane, si ililuku nakwane ngukakai ki masadrarate ka kadalranane.

¹¹ Tamatama, kiatubiaku muswane singikaiya ku pukawnungasu si palribulu nakwane; madringelresesu, kiatubiaku muswane palribulaili pakidaili ki akwalriane!

¹² Singikai ku kai maelaela ka sakialibakesu nakwane, kiatubiaku muswane mwalra akucu ki badhali. Kiatubiaku muswane amuda sanaka wadredrepete nakwane ka umawmase, asi lwiyane sasiakawlaku muswane.