Lasenai 142 - Ngudradreadrekadhane Ka Sisiu 魯凱語聖經Kiatubi ku akiparalubane ka inulri Tusenai ki Davidi ka sabulrwane ka senai saikai barungulu, ka inulrini. 1 Kiatubiaku ku akiparalubane ki Tamatama; akwadravaku papia iniane kitubi. 2 Papiaku iniane pelaela patuelre ku sakwalrialrili; papiaku iniane pelaela patuelre ku kwalrianeli. 3 Lu lri kasulringa naku, wathingale ku lri ka apianeli. Ikai ki tadadadavacaneli ki kadalranane, ku badhali wapaipai ku lravathe si lri kabebetethe nakwane. 4 Lu papiaku vanale si viri masiasirare, kainaku maka kiadringai ku talragi kulri kela palribulu; la kainaku maka kidringai ku amuberane ku kadalranane; kadrwa ku umawmase ku makalithi nakwane. 5 Tamatama, papiaku muswane kitubi ku akiparalubane. Tamatama, amanisu ku takilakebaneli; amanisu ku murikaikaili patueelre ku tapanianianiakaneli. 6 Kiatubiaku muswane kilalra kai lingau ki kitubitubili ku akiparalubane, asi lwiyane yakainga naku ki sulriane. Kiatubiaku muswane palribulaili pakidaili ki wadredredrepete nakwane ka laumawmase, asi lwiyane kwi lalasu magaagarange nakwane. 7 Kiatubiaku muswane palribulaili pakidaili ki laamatikurwane, la nau dulru drengedrengere ku naganesu; ku madringelrese ka umawmase lri ngithalringulu nakwane, asi lwiyane makalithisu marasikai nakwane. |