Lasenai 141 - Ngudradreadrekadhane Ka Sisiu 魯凱語聖經Maungane ka inulri Tusenai ki Davidi. 1 Tamatama, kiatubiaku muswane, bwala kirarimwa paralubu nakwane! Lu kitubiaku muswane, kilalraili! 2 Ku inulri ani mia ki nilamalamane ka sangwalreme ka ebelre mubelenge mwa cucubungu muswane; lu cidingaku kai alrimali ani asapatarumarane ki maungu. 3 Tamatama, kiatubiaku muswane ruthuka kai ngudwili; kiatubiaku muswane lakeba kai bibianeli. 4 Kiatubiaku muswane madha papia nakwane ki angilisianane, si kai karededele twalrau ki tangangangace ka umawmase; kiatubiaku muswane madha pakipaelrelre nakwane ki pangiakaneane lini. 5 Lri tarumaraku kamani ku sakaelaelane ara sakialibake ki madringelrese ka umawmase, si kai tarumara ku musakene nakwane ki tangangangace ka umawmase, asi lwiyane tainulrinulriianaku kai palraingi ku ngangacane lini. 6 Kwi tarasangililuku liniane lu tuverevere ki abelenge ka tukadrane, ku laumawmase lri thingale ala ka patengane ka kai madraedrangelre kai vagali. 7 Kwi culrale lini kiacilri pikai thili ki tadralredralrekane, mia ki kiacukare mawtatiki ka angatu. 8 Ai, Tamatama, lri kasalrwaku satalu muswane; lri kitubiaku ku apalribulanesu, kiatubiaku muswane madha cilricilri nakwane! 9 Kiatubiaku muswane madha paulrabulrabuku nakwane ku paipai lini ku lravathe, palribulaili pakidaili ku tukulru ki latangangangace. 10 Ku manganganga ka umawmase ani mulrabuku mwa ki lravathe lini, la nau kasulivate mubere. |