Lasenai 140 - Ngudradreadrekadhane Ka Sisiu 魯凱語聖經

Kiatubi ku akipalakebane

Tusenai ki Davidi. La baai ki tarasangililuku ki sikatai.

¹ Tamatama, kiatubiaku muswane pakidailaili ki tangangangace ka umawmase; kiatubiaku muswane palakebaili ku kaika akikabebetethaneli ki tarangikarakarakacane.

² Kwi lalasu vaeva ku kidremedreme kikaikake ku ngialisiane, la beabeabekace ku amakaririvwane luka vaivaivaai.

³ Kwi lridame ki lalasu mia ki siduduku ka sulrau; kwi bibiane lini mia ki swabe ka yakai ku duku.

⁴ Tamatama, kiatubiaku muswane pakidailaili ki puku ki tangangangace; ku kaika akikabebetethaneli ki tarangikarakarakacane; kwi kikaikake lini lri patubakebake nakwane.

⁵ Ku paramuramuru ngikalrilrigu ka umawmase wapaipai ku lravathe si lri kabebetethe nakwane; kwi lalasu twalrepengenga ku tukulru lini, si tara kadalranane tukulru ku apwalrane nakwane.

⁶ Papiaku ki Tamatama iya kai: Amanisu ku Twaumaseli. Tamatama, kiatubiaku muswane kilalra kai lingau ki kitubili ku akiparalubane!

⁷ Abebeelengenga ka Tamatama, makeceecengenga ka takipalribulribulaneli! Yakaisu ki tamakakaruburuburane palakebe nakwane.

⁸ Tamatama, madha pangimiamia ku kidredredreme ki tangangangace ka umawmase; kiatubiaku muswane madha pasikiku ku kikaikake lini, amani lu ngitatwabelenge kwi lalasu.

⁹ Kiatubiaku muswane madha paakacikaci ki labadhali; ku kukukuludru lini nakwane ani papia ki kinawmasane lini.

¹⁰ Ku madrareeange ka lrangele ani mucilri makakai ki awlru lini; kwi lalasu ani kicilri pwa ki valrulrange, la palralrawthunga kai dulru mubelenge.

¹¹ Ku wacapange kukusu ki palrapalra ka umawmase ani kai dulru acegecege; ku ngikararakacane ka umawmase ani ki amudu ki amatikurwane.

¹² Tamatama, lri palakebesu ku kindri ki taturawramuru; wathingalaku lri pasikaisu ki matiakukuru paaru swadrau ku dringelresane.

¹³ Ku madringelrese ka umawmase lri drengedrengere muswane; kwi lalasu lri ikaikai ki cucubungusu.