Lasenai 139 - Ngudradreadrekadhane Ka Sisiu 魯凱語聖經

Tathingalane patuelre si tapalakebane ki Twaumase

Tusenai ki Davidi. La baai ki tarasangililuku ki sikatai.

¹ Tamatama, paladekesu drele nakwane, wathingalesu nakwane.

² Ku tangivelevelaneli wathiingalesu patuelre; adravane twalaisu ki adaidaidaaili mialrisu thingale kai takidremedremaneli.

³ Lu kawaungaku lu isadraku, wadrelesu patuelre; wathingalesu ku tapiapianeli.

⁴ Tamatama, lu kainaku avavagana, wathingalengaasu ku aiyaneli.

⁵ Ngiathalringulusu nakwane; arakaisu ku pukusu palakebe nakwane.

⁶ Wathingalesu nakwane turaamuru, ka kaika amaka thingalaneli.

⁷ Lri papiaku inu katwase ala dulru kidaili kilepenge muswane? Lri papiaku inu katwase ala dulru mubere muswane?

⁸ Lu musubelebelengaku, lri tara ikaisu kwini; lu muswadriadringaku, lri mialrisu ikai kwini.

⁹ Adravane lu ngipaladhaku papia talrawane ka tangibwalane ki vai, ka yakaiyaku tali talriwgane ka taalikaiyane ki laveke,

¹⁰ lri tara ikaaisu kwini sangililuku nakwane; lri ikaisu kwini paralubu nakwane.

¹¹ Lri dulrwaku kitubi ki dradrimitane kabungu nakwane, si kitubi ki ngiathalringulu ka ledra adradrimitane;

¹² ai papia muswane, ku dradrimitane kaika madradrimiti, lukamaungu si lukavaiyane mararaamau ledra. Ku dradrimitane si ledra papia muswane mararamau patuelre.

¹³ Kai adringi ki kinawmasaneli amanisu ka wabekace; ikai ki barange ki ina wadarepesu nakwane.

¹⁴ Wadrengedrengeraku muswane, asi lwiyane ku takibekacaneli matiasamali matiamukuludru; kwi tapianesu matiasamali turamuru. Kai kidremedremeli wathingale.

¹⁵ Kiadarepaku ikai ki barange ki ina, la ikai ki kadradridrimitane aru kadraadrau, ku tangidarepane ki laculrale, wathiingalasu.

¹⁶ Sa kainaku kitulalakeana, wadrelengaasu nakwane; kudra kelretesu ku vai, sakaiyana kela, wapacaseenga ikai ki mibusu.

¹⁷ Twaumase, ku takidremedremanesu matiasamali turamuru! Makucingalre turamuru asipi ku takidremedremanesu!

¹⁸ Ana lri asipaku, lri ka makakalra ki enai ki laveke. Lu pacunaku, yakaaiyanaku taelre muswane.

¹⁹ Twaumase, anatumane la papacaisu amudu ki tangangangace ka umawmase! Anatumane ku tarangikarararakacane ka umawmase la katwase kidaili nakwane!

²⁰ Kwi lalasu kawariva tudreadrekase muswane; kwi lalasu amia ku ngialisiane ku vaga pasalriu muswane.

²¹ Tamatama, mavalracevacaku si kalrase turamuru ki malisilisi muswane ka umawmase! Mavalracevacaku turamuru ki wabaebaebalre muswane ka umawmase!

²² Magirimucaku turamuru liniane; twabadhaku drele liniane.

²³ Twaumase, kiatubiaku muswane drelaili, si thingale kai kidremedremeli; kiatubiaku muswane kilrialringavaili, si paladeke drele kai kidremedremeli.

²⁴ Kiatubiaku muswane drela lu ikai lutumane ku paramuru ka kaika patengane ku kidremedremeli; kiatubiaku muswane ililukaili ngukakai ki palralrawthu panianiake ka kadalranane.