Lasenai 135 - Ngudradreadrekadhane Ka Sisiu 魯凱語聖經

Wadrengedrengere ka senai

¹ Haliluya! Lasasiakawlu ki Tamatama, drengedrengera ku nagane ki Tamatama.

² Kunumi ka acegecege kisikawkawlu ikai ki daane ki Tamatama, ikai ki Alrivilrivi ka taikaikaiyane ki Twaumaseta ka laumawmase,

³ drengedrengera ki Tamatama, asi lwiyane amani ku mathaithariringa; senadha drengedrengere ku naganeini, ngwalai ki sakialibakeini.

⁴ Ngiapapasikai pilri ki Yakubu, la pilri ki swa Iseraylri ngitatu iniane.

⁵ Wathingalaku ki Tamatama ka saniange; ku Tamatama walribate sanaka twaumase.

⁶ Ikai subelebelenge, ikai kawmasane, ikai ki laveke, ikai adringi ki kadaengane, ku Tamatama ngiasasingikaai ku takidremedremaneini pia ku nau pia iyaini.

⁷ Ku Twaumase patwalai ki taalikaiyane ki kadaengane pubelenge ki ememe si kulrulrungu, la pamailuku ku lrikace ki maadrau ka udale kainganai; la patwalai ki drawsuluini ku valrigi ipi.

⁸ Ku Twaumase yakai Izipiti papacai patueelre ki aswalalanga kitulalake, adravane ka umawmase, ka nilapulapwane, papacai patuelre.

⁹ Ikai kwini, paiya ku palrealrebane ka puku, putaluvaivai ku pinangu Twaumasane ka puku, pathavungu ki talialalai ki swa Izipiti si lasasiakawluini.

¹⁰ La amudu ki takaalra ka kuni, si papacai ki garagarange ka latalialalai:

¹¹ Yakai ku Sihunge ka talialalai ki swa Amuri, Uge ka talialalai ki swa Basane, si patuelre ka latalialalai ki swa Kanange.

¹² Ku Twaumase wamalra ku lakadaengane lini si patarumara baai ki kawkawluini, patarwamara baai ki swa Iseraylri tutacekecekelane lini.

¹³ Tamatama, ku naganesu lri pakela palralrawlrawthu; ku lamwabaibalrithi ka umawmase lri ngulringalringau muswane makanaelre.

¹⁴ Ku Tamatama lri pusakai ki kawkawluini, lri kakalithi ki lasasiakawluini.

¹⁵ Ku lasamiamiange ki lakuni arakai ku kingi si gingi darepe, ka alrima ki umawmase ka wadarepe.

¹⁶ Ki lakikwini yakai ku ngudwi ai kai maka wadulru kawriva, yakai ku maca ai kai maka wadulru drele,

¹⁷ yakai ku calringa ai kai maka wadulru kilalra, ku ngudwi lini kadrwa ku niake.

¹⁸ Kudra wadarepe si kipawtenga ki samiamiange ku laumawmase makanaelre ani makitu mararaamau ki darepe lini ka samiamiange makanaelre.

¹⁹ Swa Iseraylri, drengedrengera ki Tamatama! Labarakalai ki tai Arungu, drengedrengera iniane!

²⁰ Swa Lrivi, drengedrengera ki Tamatama! Sanaka mwasakene mukuludru iniane ka umawmase drengedrengera iniane!

²¹ Drengedrengera ki yakai Ziyungu ka Tamatama, drengedrengera ki yakaikai Yerusalrime ka Tamatama. Haliluya!