Lasenai 132 - Ngudradreadrekadhane Ka Sisiu 魯凱語聖經

Wadrengedrengere ki daane ki Twaumase

Papwadradradha ka senai.

¹ Tamatama, kiatubiaku muswane madha karimurimuru ki Davidi; kiatubiaku muswane ngulringava ku kiadilini patuelre ku sakwalrialri.

² Tamatama, kiatubiaku muswane pulringava ku tatungimiyaiyaneini papia muswane kiketekete, ku tatungimiyaiyane papia ki wadulru sanaka manemane ka Twaumase ki Yakubu kiketekete iya kai:

^3-5 Sa silasilapaku ku aikaiyane ki Tamatama, pasikai ki wadulru sanaka manemane ka Twaumase ki Yakubu silasilape ku aikaiyane ku daane; kainaku lri mudaane ki daaneli lutumane; kainaku lri apece lutumane, si kai ngikatatudru lutumane.

⁶ Kialalra nai ku Langiane ki Twaumase yakai Bithelrihime amia; yakai nai kavai Yarime ubulane kidringai.

⁷ Amia nai kai: Nai mudaane ki taikaikaiyane ki Tamatama; nai mwa cucubungu ki taetalaneini sukubu.

⁸ Tamatama, ngidrakala, si mwa ki taisadrasadranesu, si tupapalra ki sapelaelane ka pukusu ka Langiane mudaane ki Alrivilrivi ka balrawbau.

⁹ Ku labarakalaisu ani sipalimemelre ku dringelresane; ku kawkawlusu ani akwadrau riariange kiraragai.

¹⁰ Tamatama, napwakawnungasu ki sasiakawlusu ka Davidi; kiatubiaku muswane madha cilricilri ki pilrisu si cegecege ka talialalai.

¹¹ Kiaketeketengasu ki Davidi, kaisu lri ngukusawlri lutumane. Amiasu kai: Lri cegecegaku ki lalakesu ka sawvalai atalialalai; kwi lasu lri mucungulu ki taetalanesu ka talialalai.

¹² Ku agaganesu alaiyasi paluludu kai kiketeketeli, si pangimia ku baaili liniane ku drekase, ku lagagane lini lri mialri mucungulu kai taetalanesu ka talialalai.

¹³ Ku Tamatama wapilringa Ziyungu; ku Twaumase twataikaikaiyaneini ki kavai.

¹⁴ Ku Twaumase amia kai: Lri palralrawthaku ikai kikai; kikai yai lri ka taikaiyaneli gemegeme ku puku.

¹⁵ Lri baadhaku ku murikai ki Ziyungu patuelre; lai lri pakabucukaku pangulwaadhane ki matiakukuru lini.

¹⁶ Lri papelaelaku ki labarakalai ku sapalribulaneli; ku tengatengane savaeva ku kidremedreme ka swa Ziyungu lri akwadrau kiraragai.

¹⁷ Lri ikaiyaku kikai pangiradhekane ku tangeea ka mwabaibalrithi ki Davidi, lai lri atalialalai kwini lasu; lri ikaiyaku kikai si pawcucungulu ku taetalane ki cegecegeli ka talialalai.

¹⁸ Lri paamakiaku ki labadha lini, ai kwi kuni ki lasu lri ngiesadhane ngiradhekane.