Lasenai 129 - Ngudradreadrekadhane Ka Sisiu 魯凱語聖經

Wakukusu ki badha ki swa Iseraylri

Papwadradradha ka senai.

¹ Iseraylri, ala kawriva; twalaisu ki vavalake, twangitwatumane kabebetethe muswane ku labadha.

² Twalai saka vavalakaku pakela kaiasasane, ku badha matiangeange ku takabebetethane nakwane, ai kwi lalasu kai akaci nakwane.

³ Kwi lalasu wasuru ku bakici ki dula pikai ki drelrekeli, mia ki tapavilringane ki tarakawaungu ka walruku pwadringi tulraagi.

⁴ Ai ku Tamatama madringelrese; patwalai ki taadurianeli si pulatadre nakwane.

⁵ Kudra laumawmase ku mavalracevace Ziyungu amaki si kiarubwane makanaelre.

⁶ Kwi lalasu ani mia ki ubulu ka wacebecebe ikai cavalri, lu kaiyana kaadrau marudameenga;

⁷ kadrwa ku umawmase kulri kitaleke, asi lwiyane ku nierecane bekelane turamuru.

⁸ Kadrwa ku lri iya kai ku walribalribate: Ku Tamatama ani subulrubulru baai muswane! Pangwakai nai ku nagane ki Twaumase subulrubulru muswane!