Lasenai 119 - Ngudradreadrekadhane Ka Sisiu 魯凱語聖經

Hulrice ki Tamatama

¹ Ku kadrwa ku pwalane ku kakwakudhane, si paluludu ku hulrice ki Tamatama ku umawmase yakai ku akaesadhane turamuru!

² Ku kialalra si pasalaladha ku drekase ki Tamatama, la savaeva ku kidremedreme pasalaladha iniane ku umawmase yakai ku akaesadhane turamuru!

³ Ku miyaiya kai ka umawmase kai lri pasalriu; kwi lalasu ngwakakaikaai ku kadalranane ki Tamatama sikakathane.

⁴ Tamatama, patarwamarasu baai naiane ku hulrice, ku lrika akapatengatenganane nai paluludu.

⁵ Siadramaku turamuru ku lrika adulrwaneli tukapatengatengane ku kidremedreme paluludu ku hulricesu!

⁶ Alaiyasi tukucingalraku ku padradrekasesu patuelre, lri kainaku kiarubwane.

⁷ Lu kicawcakwanaku ku aparamaramavane ka padradrekasesu, lri arakai ku mabula ka kidremedreme drengedrengere muswane.

⁸ Lri paluludaku ku hulricesu; kiatubiaku muswane madha cilricilri nakwane!

Pasalaladha ku hulrice ki Tamatama

⁹ Lri tungitwatumane kabula ku tapanianiakane ki layacengecenge? Amani ku apasalaladhane ku drekasesu.

¹⁰ Lri savaevaku ku kidremedreme kisilape muswane; kiatubiaku muswane madha pabaebaebalre nakwane ki padradrekasesu.

¹¹ Lri pikaiyaku ki kidremedremeli ku vagasu, ku kaika apasalrivaneli muswane.

¹² Tamatama, lri drengedrengeraku muswane; kiatubiaku muswane bulrwaili ku tinukakudhananesu.

¹³ Lri akwadravaku pelaela ku cegecegesu ku hulrice patuelre.

¹⁴ Akuliaku ku hulricesu, ka silrialribate ki sanaka tacekecekelane.

¹⁵ Lri kicawcakwanaku ku sabulrwanesu; kiadreedremaku ku tabulrwanesu.

¹⁶ Twasakiararagadhaku ku hulricesu; lutumane kainaku lri karimuru ku drekasesu.

Ku sakiaragai yakai ki apaluludane ku hulrice ki Tamatama

¹⁷ Kiatubiaku muswane ku apakaesadhane ki sasiakawlusu, la nau paluludu sapanianianiakanaku ku sabulrwanesu.

¹⁸ Kiatubiaku muswane papanumacaili, la nau drele ku matisamaliane ku patengane ka sabulrwane ki hulricesu.

¹⁹ Ku taikaiyaneli kai kawmasane yai badhabadhaku sikakathane; kiatubiaku muswane madha sekesekete nakwane ku padradrekasesu.

²⁰ Ngwalai ku taakulianeli ku padradrekasesu lukamialrealre lukamaungu, kai kidremedremeli mia ki kwaculuculu kakucingalre kiadili.

²¹ Maelaelasu ki ngiakalrilrigu ka umawmase; ku wacilri katwase ki drekasesu ku umawmase lri kipusu!

²² Kiatubiaku muswane mwalra kai kitusinalremelremeli si kipusupusuli, asi lwiyane pasalaladhaku kai hulricesu.

²³ Adravane nau tara kabebetethe iyaiya nakwane ku warathudu, kwaku ka sasiakawlusu lri kicawcawcakwanaku ku tinukakudhananesu.

²⁴ Ku sabulrwanesu pakiararagai nakwane, ka maru amaninga ku tarabulrubulru si katalragianeli.

Malrithethe ku apaluludane ku hulrice ki Tamatama

²⁵ Kialrumadhaku si tubakebake ikai daedae; kiatubiaku muswane singikaiya ku pukawnungasu si palribulu papanianiake nakwane.

²⁶ Papiaku muswane ngipapelaela ku piali patuelre, la tubalresu nakwane; kiatubiaku muswane bulrwaili ku tinukakudhananesu.

²⁷ Kiatubiaku muswane bulrwaili pathingale kwi hulricesu; lri kicawcakwanaku kwi matiasamali ku sabulrwanesu.

²⁸ Kiaupungaku ki thekelrane; kiatubiaku muswane singikaiya ku pukawnusu si pakakecenge nakwane.

²⁹ Kiatubiaku muswane madha pangukaikai nakwane ki kaika patengane ka kadalranane, mueleba ku migemi si bulru nakwane ku hulricesu.

³⁰ Wapilriaku ku kadalranane ki patengane ka sabulrwane; twakucingalraku ki tinukakudhananesu.

³¹ Tamatama, paluludunga naku ku bulrusu; kiatubiaku muswane madha pakiaruburubwane nakwane.

³² Lri kisamulaku pasalaladha ku drekasesu, asi lwiyane lri drimasu ku lrika aru thingalaneli si pulringalringau.

Kiatubi ku amukidremedremane ku pacugane ki hulrice

³³ Tamatama, kiatubiaku muswane bulrwaili ku pacugane ki hulrice, mwabangalraku katapalululudane.

³⁴ Kiatubiaku muswane papiaili lalrwai kwi hulricesu; mwabangalraku ka tapasalaladhaane, savaeva ku kidremedreme paluludu.

³⁵ Kiatubiaku muswane ililukaili ngukakai ki kadalranane ki padradrekasesu, asi lwiyane patwaladhaku kwini malra ku akiragadhane.

³⁶ Kiatubiaku muswane pakiragadhaili paluludu ku padradrekasesu ka makadrwadrwa ki marau ki paisu.

³⁷ Kiatubiaku muswane madha patukucingacingalre nakwane drele ki kaika patengane; kiatubiaku muswane pangukaiya ki kadalrananesu patarumara nakwane ku bavane ka niake.

³⁸ Ku takiketeketanesu puvaga ki mwasakene ukuludru muswane ku umawmase, kiatubiaku muswane ku lrika angimiane ikai ki sasiakawlusu,

³⁹ kiatubiaku muswane pakidailaili ki ukulukuludruli ka akitusinalremeane; ku padradrekasesu ala mathaariri turamuru!

⁴⁰ Lri pasalaladhaku ku drekasesu; kiatubiaku muswane pangukaiya ki dringelresanesu patarumara nakwane ku bavane ka niake.

Masalru satalu ku hulrice ki Tamatama

⁴¹ Tamatama, kiatubiaku muswane papiaili putaluvaivai ku kai maelaela ku sakialibakesu; kiatubiaku muswane singikaiya ku pukawnusu si palribulu nakwane.

⁴² La nau dulru tubalre ki twasinalrelrelreme nakwane ka umawmase, asi lwiyane masalrwaku ku vagasu.

⁴³ Kiatubiaku muswane baadhaili ku puku la nau dulru pelaelaela ku patengane ka sabulrwanesu, asi lwiyane ku sidramadramali yakai ki padradrekasesu.

⁴⁴ Lri pacungulaku paluludu ku hulricesu, pakeela lumamilringi.

⁴⁵ Lri ngilralraaingaku panianianiake, asi lwiyane paluludaku ku bulrubulrusu.

⁴⁶ Lri papiaku ki latalialalai pelaela ku ladrekasesu, kainaku lri ngwalai kai si kainu kalrumale.

⁴⁷ Twakiraragadhanaku lu paluludaku ku drekasesu, asi lwiyane madalamaku ku drekasesu.

⁴⁸ Mwasakenaku tukucingalre si kadalame ki padradrekasesu; lri kidredredremaku ku sabulrwanesu.

Masalru ku hulrice ki Tamatama

⁴⁹ Kiatubiaku muswane ngulringava kudra takiketeketanesu puvaga ki sasiakawlusu, ngwalai ki vagasu la ikainga ku sasiadradramali.

⁵⁰ Adravane lu ikaaiyaku ki akwalriane kiasasaku, asi lwiyane ku pukawnungasu patarwamara nakwane ku bavane ka niake.

⁵¹ Ku ngiakalrilrilrigu ka umawmase kai watelrai tusinalrelreme nakwane, ai kainaku wabaebalreana ki hulricesu.

⁵² Pwalringavaku ku nabulrubulrusu nakwane; Tamatama, ku sabulrwanesu kiasasaku.

⁵³ La drelaku ki manganganga ka umawmase sa baebalre ki hulricesu, ku lisiane ki kidremedremeli kai maka aruthukane.

⁵⁴ Wasulasuladhaku ikai kai kawmasane; twasenadhaku si drengedrengere ki drekasesu.

⁵⁵ Tamatama, yakaiyaku ki maungu kidredredreme muswane; la pasalaladhaku ku hulricesu.

⁵⁶ Ku paluludu ku drekasesu, amani ku akirararagadhaneli.

Kiasamula ki hulrice ki Tamatama

⁵⁷ Tamatama, amanisu ku murikaikaili patueelre; malritheethenga naku paluludu ku hulricesu.

⁵⁸ Vaeva kai kidremedremeli papia muswane kitubi, kiatubiaku muswane singikaiya ku pukawnungasu kakalithi nakwane.

⁵⁹ Ngiakakidredremaku ku tangukakaiyaneli ku kadalranane, la kalrithethenga naku ngibangulu papia ki tinukakudhananesu.

⁶⁰ Paluludaku ku padradrekasesu, ka kadrwa ku lrilrikane.

⁶¹ Ku manganganga ka umawmase arakai ku calrisi kerenge nakwane, ai kainaku marimurimuru ku hulricesu.

⁶² Ngiadrakalaku saka kabiceacelrakane ki maungu, si drengedrengere ku padradrekase ki dringelresanesu.

⁶³ Ku mwasakene mukuludru muswane, la paluludu ku hulricesu ka umawmase talragili makanaelre.

⁶⁴ Tamatama, kai kawmasane swaete ku kai lri akabalrithi ku sakialibakesu; kiatubiaku muswane bulrwaili ku padradrekasesu.

Tinukucingalrane ka hulrice ki Tamatama

⁶⁵ Tamatama, tasingikaiyanesu ku tangikaketeketanesu tuthariri pakaesai ki sasiakawlusu.

⁶⁶ Kiatubiaku muswane patarumaraili ku lrigilane si thingalane, asi lwiyane masalrwaku ku drekasesu.

⁶⁷ Sa kaisu pathavungwana nakwane, tapasalrisalriivanaku, ai kaiasasane palululudunga naku ku vagasu.

⁶⁸ Ala masulrapelesu turamuru, ala kialibakesu turamuru! Kiatubiaku muswane bulrwaili kwi padradrekasesu.

⁶⁹ Ku ngiapaparamuru ngikalrilrigu ka umawmase wabeabekace ku vaga tulililisi nakwane, ai lrika vaeva kai kidremedremeli paluludu ku sabulrwanesu pakipapawlringau.

⁷⁰ Kwi lalasu makulrungu ka kadrwa ku thingale; ai twaakiragadhaneli ku hulricesu.

⁷¹ Ku kipathavuthavunguli akaesadhaneli, asi lwiyane pakiacawcakwane nakwane ki padradrekasesu.

⁷² Ku patarumarasu ku hulrice silrialribate ki kingi gingi paisu patuelre kai kawmasane.

Dringelresane ka hulrice ki Tamatama

⁷³ Wabekacesu nakwane, la palakebesu nakwane; kiatubiaku muswane patarumaraili baai ku athingalane, si dulru kicawcakwane ku hulricesu.

⁷⁴ Ku mwasakene mukuludru muswane ku umawmase sana drele nakwane lri kiraragai, asi lwiyane masalrwaku satalu ki vagasu.

⁷⁵ Tamatama, wathingalaku ku saibangesu aparamaramau; pathavungusu nakwane, asi lwiyane patengatenganesu.

⁷⁶ Kiatubiaku muswane singikaiya ku pukawnusu ki sasiakawlusu, arakaiya ku kai akabalribalrithi ku sakialibakesu sasa nakwane.

⁷⁷ Kiatubiaku muswane kakalithaili, la nau panianiake, asi lwiyane kwaku twaakiragadhaneli ku hulricesu.

⁷⁸ Kudra la wacapange kukusu nakwane ka paramuramuru ngikalrilrigu ka umawmase ani kiarubwane; ngukai nakwane, lri kidredredremaku ki tabulrwanesu.

⁷⁹ Kudra la mwasakene ukuludru muswane ku umawmase ani papia nakwane, ku wathingale ku hulricesu ku umawmase ani pasalaladha nakwane.

⁸⁰ Nai savaevaku ku kidremedreme paluludu ku padradrekasesu, la nau kai sipai si kiarubwane.

Kiatubi ki Tamatama ku akiparalubane

⁸¹ Tamatama, kiadulrunga naku ki sasiadradrama ki sapalribulanesu; ku sidramadramali yakai ki pukawnungasu.

⁸² Kai macali ngwalai ku sasiadradrama ki pukawnungasu si rimarimace, kiavagaku: Lwiganenga lri sasasu nakwane?

⁸³ Miaku ki mapuricinga ka supilri ka vaeva ka tabavane ka thuthubungu; ai kainaku marimuru ku drekasesu.

⁸⁴ Lri tarathainwana naku ukalava? Lwiganenga ala lri pathavungusu ki mabebetethe nakwane ka umawmase?

⁸⁵ Kudra kai palululudu ki hulricesu ka paramuru ngikalrilrigu ka umawmase walrukunga ku valrulrange kalri lrubange nakwane.

⁸⁶ Kwini lalasu wavuutha kabebebetethe nakwane, kiatubiaku muswane paralubaili; ku padradrekasesu asudralrwalrwane patuelre.

⁸⁷ Kwi lalasu papacapacainga nakwane, ai kainaku lri cilri ku drekasesu.

⁸⁸ Kiatubiaku muswane patarumaraili ku bavane ka niake, si palralrawthu kilibake nakwane. La nau paluludu ku hulricesu.

Masalru ku hulrice ki Tamatama

⁸⁹ Tamatama, ku vagasu lri ikai palralrawthu, acegecege ikai subelebelenge.

⁹⁰ Ku takapatengatengananesu lri ikai palralrawthu; wacegecegesu ki kadaengane, la lrika palralrawthu ikai.

⁹¹ Sanaka manemane singiakai ku takelreetanesu, pakela kaikameane ikai, asi lwiyane sanaka lamanemanenga sasiakawlusu.

⁹² Alaiyasi kainaku twaakiragadhane ku hulricesu, naika yakainga naaku ki sakwalrialri pacai.

⁹³ Lutuumane kainaku lri cilri ki padradrekasesu, asi lwiyane arakaisu kwini papanianiake nakwane.

⁹⁴ Kwaku muswanenga, kiatubiaku muswane palribulaili, asi lwiyane paluludaku ku drekasesu.

⁹⁵ Ku tangangangace ka umawmase mwakalavalava ku apapacadhane nakwane, ai takidredredremaneli ku hulricesu.

⁹⁶ Lu drelaku ki sanaka manemanenga yakaai ku alikaiyane patuelre; ai ku padradrekasesu ngwaswadrau ka kadrwa ku talikaiyane.

Akuli ku hulrice ki Tamatama

⁹⁷ Akuliaku turamuru ki hulricesu! Twaraketaku kai telrai kidredredreme iniane.

⁹⁸ Ku drekasesu taikaiyane adringi ki kidremedremeli, ala ka mathiathingalaku ki labadha.

⁹⁹ Ngithiathingalaku ki sanaka tarabulrubulru, asi lwiyane kiadredredremaku ku bulrubulrusu.

¹⁰⁰ Malrilrigilaku ki tarudrawdrange, asi lwiyane paluludaku ku drekasesu.

¹⁰¹ Kiadailinga naku ki ngialisiane ka kakwakudhane patuelre, asi lwiyane lri pasalaladhaku ku vagasu.

¹⁰² Kainaku wacilri ki sabulrwanesu, asi lwiyane amanisu ku wabulru nakwane.

¹⁰³ Ku sabulrwanesu ku vaga malimeme turamuru, ikai ki nguduili malimememe ki valu.

¹⁰⁴ Patwaladhaku ki hulricesu malra ku lrigilane, ngwalai kikai malrasaku ki ngialilisiane ka kakudhane.

Ledra ki hulrice ki Tamatama

¹⁰⁵ Ku vagasu tinakili ka waililuku ki tapudrapalaneli, si ka ledra ki kadalranane ki tapanianianiakaneli.

¹⁰⁶ Lri pangimiaku si tupudriadringai ku tangikaketeketaneli, la paluludu ku bulrusu ka dringelresane.

¹⁰⁷ Tamatama, ku kipakwalrili matelrege turamuru; kiatubiaku muswane singikaiya ku pukawnungasu si patarumara nakwane ku bavane ka niake.

¹⁰⁸ Tamatama, tarumara kai sakiaseasenane ka inulri; kiatubiaku muswane bulrwaili kwi drekasesu.

¹⁰⁹ Kai niakeli taikaiyane ki sapapacai; ai kainaku marimuru ku hulricesu.

¹¹⁰ Ku tangangangace ka umawmase wapaipai ku arai lri kabebetethe nakwane, ai kainaku wabaebalre ku drekasesu.

¹¹¹ Ku padradrekasesu amani ku palralrawthu ka tacekecekelaneli, ka kiragaragai ki kidremedremeli!

¹¹² Malrithethaku paluludu ku hulricesu, pakeela ku apalikaiyaneli kai kawmasane.

Tasutelradhane ikai ki hulrice ki Tamatama

¹¹³ Mavalracevacaku ki apapiyaiyaiya ku kidremedreme muswane ku umawmase, ai madalamaku ki hulricesu.

¹¹⁴ Amanisu ku tarapalakelakebe nakwane, ka alathareli; ku sidramadramali yakai ki pukawnungasu.

¹¹⁵ Manganganga ka umawmase, katwasaili; lri paluludaku ku drekase ki Twaumaseli.

¹¹⁶ Kiatubiaku muswane singikaiya ku vagasu paralubu nakwane, la nau panianiake; kiatubiaku muswane madha pakawlrawlrau ku sidramadramali.

¹¹⁷ Lu paralubusu nakwane, lri suteelradhaku; lrika tapaluludaneli ku drekasesu.

¹¹⁸ Wacilrisu ku wabaebalre ki hulricesu ku umawmase; ku kikaikake lini ungawngau patuelre.

¹¹⁹ Wamalrasu ki manganganga ka umawmase patuelre tuubulu, si ngwalai kikai madalamaku ku bulrubulrusu.

¹²⁰ Ngwaladhaku ki sawkukuludru muswane si manugeregere kai kinawmasaneli; la ngwaladhaku ki sawkukuludru ki asaibanganesu si kisuete ki ukuludrane.

Paluludu ku hulrice ki Tamatama

¹²¹ Aparamaramavaku si pia ku madringelrese; kiatubiaku muswane madha pikaikai nakwane ki alrima ki labadhali.

¹²² Kiatubiaku muswane tarumara si paralubu ki sasiakawlusu; kiatubiaku muswane madha patusinalrelrelreme ki laparamuru ngikalrilrigu ka umawmase nakwane.

¹²³ Ngwalai ku sasiadradrama ku sapalribulanesu, si ukalavalava ku pukawnusu, kai macali yai madrarumaadriminga.

¹²⁴ Kiatubiaku muswane singikaiya ku kai lri akabalrithi ka sakialibakesu marasikai nakwane; kiatubiaku muswane bulrwaili kwi drekasesu.

¹²⁵ Sasiakawlaku muswane; kiatubiaku muswane patarumaraili baai ku aruthingalane, la nau pulringalringau ku bulrubulrusu.

¹²⁶ Tamatama, ku lrika apangimianesu wakelanga, asi lwiyane kai laumawmase wabaebalre ki hulricesu.

¹²⁷ Akuliaku ki drekasesu ka makadrwadrwa ki kingi, walriibate ki kakingiane.

¹²⁸ Ngwalai kikai, la paluludaku ku bulrusu patuelre; malrasaku ki ngiakathaithariri ku kakudhane patuelre.

Akuli ku apaluludane ku hulrice ki Tamatama

¹²⁹ Ala matiasamali turamuru ku bulrubulrusu! ngwalai kikai lrika vaeva kai kidremedremeli paluludu.

¹³⁰ Kwi bulrubulrusu sana lalrwai waledra, ku makulrungu ka umawmase la kalrigili.

¹³¹ Manwangangaku si tungasangasangase, asi lwiyane akuliaku ku drekasesu.

¹³² Kiatubiaku muswane sirapalaili, si kakalithi nakwane; mia lu marasikaisu ki kadalamesu.

¹³³ Kiatubiaku muswane singikaiya ku pukawnungasu si kai patubakebake nakwane, la nau kai kiruthuku ki ngilisianane.

¹³⁴ Kiatubiaku muswane palribulaili pakidaili ki twasinalrelrelreme nakwane ka umawmase, la nau paluludu ku drekasesu.

¹³⁵ Kiatubiaku muswane arasakialibaka marasikai ki sasiakawlusu, si bulru nakwane kwi hulricesu.

¹³⁶ Kai lreseli mia ki kadravane ka acilai mwalwaludru, asi lwiyane kai umawmase wabaebalrenga ki hulricesu makanaelre.

Aparamaramavane ki hulrice ki Tamatama

¹³⁷ Tamatama, madringelresesu, ku hulricesu aparamaramau.

¹³⁸ Ku patarumarasu ku padradrekase, kiatulrepenge aparamaramau, si kadringelrese.

¹³⁹ Ku lisianeli mia ki wakelrakelrabe ka apwi, asi lwiyane ku labadhali twadrekase ki drekasesu.

¹⁴⁰ Ala patengatengane ku pukawnungasu! Akuliaku turamuru!

¹⁴¹ Tikiyanaku, ka kiasidrekase ki umawmase, ai kainaku marimuru ku bulrubulrusu.

¹⁴² Ku dringelresanesu yai palralrawthu ka dringelresane, ku hulricesu yai patengane ka sabulrwane.

¹⁴³ Kiapadradresengaku ku akwalriane, ai ku padradrekasesu mailuku ku sakiaragai baai nakwane.

¹⁴⁴ Ku sabulrwanesu palralrawthu aparamaramau, kiatubiaku muswane pathingalaili, la nau panianiake.

Kiatubi ku akiparalubane

¹⁴⁵ Tamatama, savaevaku kai kidremedremeli kitubi, kiatubiaku muswane tubalreaili; lri paluludaku ku drekasesu.

¹⁴⁶ Kiatubiaku muswane, palribulaili; la nau paluludu ku padradrekasesu.

¹⁴⁷ Sakaiyana kaliare kiatubiaku muswane; ku sidramadramali yakai ki pukawnungasu.

¹⁴⁸ Watalearaku kai memecane, kidredredreme ku tabulrwanesu.

¹⁴⁹ Tamatama, kiatubiaku muswane singikaiya ki kai lri kaela ka sakialibakesu si kilalra nakwane; kiatubiaku muswane paadrelana ku sakialibakesu, la patarumara nakwane ku bavane ka niake.

¹⁵⁰ Kudra ngiakararakacane ka tarakabebebetethe wadethenga nakwane; kwi lalasu kai pasalalaladha ku hulricesu.

¹⁵¹ Ai Tamatama, yakaisu thili nakwane; ku hulricesu patuelre patengane ka sabulrwane.

¹⁵² Ku bulrubulrusu wathingalenga naaku; la pacegecegesu palralrawthu ku sabulrwanesu.

Kiatubi ku akiparalubane

¹⁵³ Kiatubiaku muswane paswalebea drele kai sakwalrialrili, kiatubiaku muswane palribulaili, asi lwiyane kainaku twadreadrekase kai hulricesu.

¹⁵⁴ Kiatubiaku muswane pusakaiyaili, mukerengaili si pulatadre nakwane; kiatubiaku muswane singikaiya ku pukawnungasu si palribulu nakwane.

¹⁵⁵ Ku tangangangace ka umawmase kai lri kipalribulu, asi lwiyane kwi lalasu kai palululudu ku hulricesu.

¹⁵⁶ Ai Tamatama, madrau turamuru ku sakialibakesu; kiatubiaku muswane singikaiya ku dringelresanesu si patarumara nakwane ku bavane ka niake.

¹⁵⁷ Ku badha si twasinalremelreme nakwane ku umawmase takalra turamuru, ai kainaku wabaebalre ki hulricesu.

¹⁵⁸ Sana drelaku ki lawabaebalre mavalracevacaku, asi lwiyane kwi lalasu kai paluludu ku drekasesu.

¹⁵⁹ Tamatama, drelaili ka akuli turamuru ki sabulrwanesu! Kiatubiaku muswane singikaiya ku kai akabalribalrithi ku sakialibakesu si palribulu nakwane.

¹⁶⁰ Ku tangadrane ki hulricesu yai patengane ka sabulrwane; ku aparamaramavane ki padradrekasesu patuelre lri ikai palralrawthu.

Ngiapapatarumara ikai ki hulrice ki Tamatama

¹⁶¹ Ku yakai ku puku ka umawmase wavutha tulilisi nakwane, ai mwasakenaku tukucingalre ki hulricesu.

¹⁶² Ngwaladhaku ki lapukawnungasu si kiraragai, mia ki umawmase lu kidringai ku tinukucingalrane ka zaisange.

¹⁶³ Mavalracevacaku ki sanaka nitavuvulruucane, ai madalamaku si akuli ki hulricesu.

¹⁶⁴ Lukakaiya kingipitulaku patarumara muswane ku sakiaseasenane, asi lwiyane ku turingaringausu aparamaramau.

¹⁶⁵ Ku madalame si akuli ku hulricesu lri kisupisupilri ku sulivatane, kadrwa ku lri maka patubakebake liniane sanaka manemane.

¹⁶⁶ Tamatama, mwakalavaku ku apalribulanesu; paluludaku ku drekasesu.

¹⁶⁷ Pasalaladhaku ku bulrubulrusu; savaeva kai kidremedremeli kadalame akuli ku padradrekasesu.

¹⁶⁸ Paluludaku ku drekasesu si bulrubulrusu; kai kakwakudhaneli patuelre wadrelengasu.

Kitubi ku akiparalubane ka inulri

¹⁶⁹ Tamatama, ala palraingaili lani daruru muswane kai kitubili; kiatubiaku muswane singikaiya ku palraingingasu si patarumara baai nakwane ku aruthingalane.

¹⁷⁰ Palraingaili kai inulrili ani daruru mucucubungu muswane; kiatubiaku muswane singikaiya ku pukawnungasu si palribulu nakwane.

¹⁷¹ Lrika tadrengedrengedrengeeraneli muswane, asi lwiyane wabulrusu nakwane kwi padradrekasesu.

¹⁷² Lri senadhaku drengedrengere kwi hulricesu, asi lwiyane kwi drekasesu aparamaramau.

¹⁷³ Kiatubiaku muswane kataparalubaanaili, asi lwiyane pasalaladhaku kwi drekasesu.

¹⁷⁴ Tamatama, akuliaku turamuru kwi sapalribulanesu; kwi hulricesu amani ku sakiaragaili.

¹⁷⁵ Kiatubiaku muswane papanianiakaili, la nau drengedrengere muswane; ku bulrubulrusu ani paralubu nakwane.

¹⁷⁶ Kainaku wathingale ku atumanane, mia ki amuli ka kiu; kiatubiaku muswane bwala silapa ki sasiakawlusu, asi lwiyane kainaku waulrau karimuru ki hulricesu.