Lasenai 118 - Ngudradreadrekadhane Ka Sisiu 魯凱語聖經

Pasiakai ku taakaciane kiaseasene inulri

¹ Kiaseasena ki Tamatama, asi lwiyane amani ku mathaithaariringa; ku sakialibakeini lri ikai palralrawthu.

² Ku swa Iseraylri ani iya kai: Ku sakialibakeini lri ikai palralrawthu.

³ Ku labarakalai ki tai Arungu ani iya kai: Ku sakialibakeini lri ikai palralrawthu.

⁴ Sanaka mwasakene mukuludru ki Tamatama makanaelre ani iya kai: Ku sakialibakeini lri ikai palralrawthu.

⁵ Yakaiyaku ki takwalrialriane kitubi ki Tamatama; la tubalre nakwane, si mukerenge pulatadre nakwane.

⁶ Ku Tamatama tapalra nakwane, kainaku lri mukuludru; ku langumawmawmase lri dulru tumane nakwane?

⁷ Ku paralubu nakwane yai Tamatama; lri drelaku lu amaki ku labadha.

⁸ Lu kitubiane ki Tamatama ku akipalakebane, silrialribate ki satalu ki lri tara kaburau ka umawmase.

⁹ Lu kitubiane ki Tamatama ku akipalakebane, silrialribate ki satalu ki latarasangililuku kai ki yakawmasane.

¹⁰ Takaalra ku badha ku walringulu nakwane; ai satalwaku ku puku ki Tamatama si amudu liniane.

¹¹ Kwi lalasu twalai kidruanga kainganai lringulu nakwane; ai satalwaku ku puku ki Tamatama si amudu liniane.

¹² Kwi lalasu mia ki tumu turededele kainganai ngithalringulu nakwane, ai mia ki kwadaladalai ka cecenekane ka angatu yasasaane kulama patuelre; satalwaku ku puku ki Tamatama si amudu liniane.

¹³ Pakialringau ku takikaruburane nakwane ki lalasu, kiapatubakebakaku ki lalasu; ai ku Tamatama paralubu nakwane.

¹⁴ Ku Tamatama yai pukuli, senaili; palribulunga nakwane.

¹⁵ Ikai ki labalrawbau ki kawkawlu ki Twaumase waelraelrange ku pwataritariri kirararagai: Ku Tamatama pwataluvaivai ku maadrau ka pukuini.

¹⁶ Ku pukuini paakaci naiane; ku Tamatama pwataluvaivai ku maadrau ka pukuini.

¹⁷ Kainaku lri pacai, lri panianiakaku, si kainganai pelaelaela ku tapiane ki Tamatama.

¹⁸ Ku Tamatama napakialringau pathavungu nakwane, ai kai papacai nakwane.

¹⁹ Pasikaiyaili muelebe ku lrawlrawdru ki daane ki Twaumase; lri mudaanaku si drengedrengere ki Tamatama.

²⁰ Kikai lrawlrawdru yai lrawlrawdru ki Tamatama; kathane ku madringelrese ka umawmase kulri dulru mudaane.

²¹ Tamatama, lri drengedrengeraku muswane, asi lwiyane kialalrasu nakwane, ala akaciaku.

²² Kikai cilri ki taradumingi ka lrenege amakuciacingalrenga ka karwalai.

²³ Kikai yai tapiane ki Tamatama; ikai ki tadrelaneta matiasamali turamuru!

²⁴ Kikai yai taakaciane ki Tamatama ka vai; lri kiraragaita, lri tulrisisita.

²⁵ Tamatama, palribula naiane, palribula naiane; Tamatama, kiatubi nai muswane pakasulivata naiane pangidarepe.

²⁶ Ku Twaumase ani patarumara subulrubulru baai kudra ki pangwakai ku nagane ki Tamatama kainganai! Twalai nai ki daane ki Tamatama subulrubulru numiane.

²⁷ Ku Tamatama yai Twaumase; paledra mitane. Tapathagili ku atulrisisianeta, malra ku ricingi ki angatu si papia ki tapatarumaramarane arucucubungu!

²⁸ Amanisu ku Twaumaseli, kiaseasenaku muswane; Twaumaseli, lri pelaelaelaku pasalraelre ku sanianganesu.

²⁹ Kiaseasena ki Tamatama, asi lwiyane amani ku mathaithariringa; ku sakialibakeini lri ikai palralrawthu!