Lasenai 115 - Ngudradreadrekadhane Ka Sisiu 魯凱語聖經

Vaeva ka patengatengane ka Twaumase

¹ Tamatama, ku lrigu lri papia muswane sikakathane, kai lri papia naiane, lri papia muswane sikakathane. Asi lwiyane yakai ku takapatengatengananesu si kai lri akabalrithi ka sakialibake.

² Ku lakuni ani kivaaga naiane: Ku Twaumase numi yainu?

³ Ku Twaumase nai yakai subelebelenge; singiakaai ku takidremedremaneini pia ku awngane.

⁴ Ku samiamiange lini niarakaiyane ku kingi si gingi darepe, ka alrima ki umawmase ka wapapacase ka lawbubulu.

⁵ Yakai ku ngudwi lini ai kai wadulru kawriva, yakai ku maca lini ai kai maka wadrele,

⁶ yakai ku calringa lini ai kai maka kialalra, yakai ku ngungwane lini ai kai maka wasabalri;

⁷ yakai ku alrima lini ai kai maka wadulru sulrape, la ikai ku drapale lini ai kai maka wadadavace; kwi lalasu kai wadulru avavaga.

⁸ Kudra wadarepe si kipawtenga ki samiamiange ku laumawmase makanaelre, ani makitu mararamau ki darepe lini ka samiamiange makanaelre.

⁹ Swa Iseraylri, kasalrwa satalu ki Tamatama! Paralubu numiane, la palakebe numiane.

¹⁰ Labarakalai ki tai Arungu, kasalrwa satalu ki Tamatama! Paralubu numiane, la palakebe numiane.

¹¹ Sanaka mwasakene mukuludru iniane ka umawmase makanaelre, kasalrwa satalu ki Tamatama! Paralubu numiane, la palakebe numiane.

¹² Ku Tamatama makalithi mitane, lri patarumara subulrubulru baai mitane; lri patarumara subulrubulru baai ki wacekecekele ki swa Iseraylri; lri patarumara subulrubulru baai ki wacekecekele ki Arungu ka labarakalai.

¹³ Ku Tamatama lri patarumara subulrubulru baai ki mwasakene mukuludru iniane ka laumawmase, kai apakaelaela ku saniange si kaika saniange thadaalrane kisubulrubulru.

¹⁴ Ku Tamatama ani drima baai numiane ku lalalake, lani edhale takaalra ku lalalake lagagane numi.

¹⁵ Ku Tamatama ani patarumara subulrubulru baai numiane; amani ku wabekace subelebelenge si kawmasane ka magagemegeme ka Tamatama.

¹⁶ Kai subelebelenge Tamatamane sikakathane, ai kai kadaengane patarwamara baai ki umawmase.

¹⁷ Ku wapacai ka umawmase kai lri dulru drengedrengere ki Tamatama; ku yakainga swadriadringi ka umawmase mialri kai lri dulru drengedrengere iniane.

¹⁸ Ai kuta ka panianianiakeana ka umawmase kiaseasena iniane, twalai kikai pakeela palralrawlrawlrawthu. Haliluya!