Lasenai 111 - Ngudradreadrekadhane Ka Sisiu 魯凱語聖經

Wadrengedrengere ki Tamatama

¹ Haliluya! Lri savaeva kai kidremedremeli kiaseasene ki Tamatama, ikai ki tayelrelreane ki madringelrese ka kawkawluini kiaseasene iniane.

² Ku tapiane ki Tamatama matiasamali matisalru turamuru! Sanaka madalame iniane ku umawmase makanaelre apiathiingale.

³ Ku tapianeini swaete ku lrigu si matisalrwane; ku dringelresaneini lri ikai palralrawthu.

⁴ Ku Tamatama pangwalringau mitane ku matiasamali ku tapianeini; yakai ku migemini, si sueteane ku kalithaneini.

⁵ Ku Twaumase patarwamara baai ku akaneane ki mwasakene mukuludru iniane ka umawmase; palralrawthu pulringau ku cegecegeini ku takiketeketane.

⁶ Papia ki kawkawluini putaluvaivai ku maadrau ka puku, la malra ku lakadaengane ki maelane ka lazuku si baai liniane.

⁷ Ku tapianeini patuelre patengatengane la aparamaramau; ku padradrekaseini patengatengane ka asudralrwalrwane.

⁸ Ku drekaseini palralrawthu kalri ngimia, singiakai ki patengatengane si dringelresane cegecege.

⁹ Ku Twaumase palribulu ki kawkawluini, si kapalralrawthu ku kiketeketeini liniane. Saniange si matiukuludru!

¹⁰ Ku mwasakene mukuludru ki Tamatama yai tatwaladhane ki lrigilane, ku Twaumase patarwamara ku pacengecenge turingaringau baai kudra ki palululudu ku drekaseini ka umawmase. Ku Twaumase naikidrengedrengere palralrawthu!