Lasenai 109 - Ngudradreadrekadhane Ka Sisiu 魯凱語聖經

Tasidrurwane ki kwalrialri

Tusenai ki Davidi. La baai ki tarasangililuku ki sikatai.

¹ Drengedrengedrengereli ka Twaumase, kiatubiaku muswane madha ka taicelreebane.

² Kudra latangangangace matavuvulrucu ka umawmase mabebebetethe nakwane. Kwi lalasu watavuvuvulrucu tulisilisi nakwane,

³ arakai ku sapapacai ka vaga dula nakwane, wavuthavutha kabebetethe nakwane.

⁴ Adravane kilibakaku liniane, si pasikai liniane inulri, kwi lalasu kiaecebelringa nakwane.

⁵ Kwi lalasu arakai ku lisiane pangibilri ki mathariri, la arakai ku girimucane pangibilri ki sakialibake.

⁶ Kiatubiaku muswane arakaiya ki ngialisiane ka tarasaibaibange si saibange ki badhali, arakaiya ki badhaini kukusu iniane.

⁷ Kwi lasu ani kisaibange, si kitupasalrivane; ku inulrini ani mialri ka pasalriu.

⁸ Ani aru kaedrekane ku niakeini; ku palrapalra ani mubalrithi ki taetalaneini ka awngane.

⁹ Ku lalalakeini ani apakulrulrulu, ku taelrelreini ani awalibakane ka ababai.

¹⁰ Ku lalalakeini ani kakadrwa ku amwane ku daane, la taralrawlrawlrawdru kitubitubi; kwi lalasu ani twalai ki buruburuku ka daane kipakatwase!

¹¹ Ku tawki ki akiameini ani malra patueelre ku tacekecekelaneini; ku kaika thingaleini ka umawmase ani ribici ku kwalrialrini malra patueelre.

¹² Kwi lasu ani kai maka kikakalithi ki palrapalra; ku pakulrulruluini ani kai maka kikakuru.

¹³ Ku mwabaibalrithi iniane ani kiamudu; ku takataianeananeini ani kai maka daruru ki lalalake!

¹⁴ Ku Tamatama ani ngulringalriingau ku pasalrivane ki cucungulaneini, si kai karimuru ku tapasalrivane ki tinaini.

¹⁵ Ku Tamatama ani palralrawthu ngulringau ku pasalrivane lini; kwi lalasu ani kitulrepenge kikarimuru.

¹⁶ Asi lwiyane kwi lasu kadrwana ku takilibakaneini, kathane ku thingaleini ku adredrepetane ki kwalrialri matikurukuru ka umawmase, la kisanu papacapacai ki kwalrialri ku kidremedreme ka kadrwa ku paralubu ka umawmase.

¹⁷ Kwi lasu madalame pusu, ku sapuswane ani makakai iniane! Kwi lasu malrase subulrubulru, ku sasubulrubulrwane ani kidaili iniane.

¹⁸ Kwi lasu lu pusu mia ki sialaimai pakaduai; kikai sapuswane ani mia ki acilai ladeke iniane, mia ki abera ladeke ki culrale ki awlruini!

¹⁹ Kikai sapuswane ani mia ki laimai cabu iniane, mia ki lakete kataruthukane iniane.

²⁰ Ku Tamatama ani pia kikai pathavungu ki labadhali, bilri kudra ki la arakai ku ngialisiane ka vaga kabebetethe nakwane ku umawmase.

²¹ Ai, abebeelengenga ka Tamatama, kiatubiaku muswane singikaiya ku pukawnungasu si paralubu nakwane, la ngwalai ku sakialibakesu, takamathaithariranengasu si palribulu nakwane.

²² Asi lwiyane matiakurwaku si kwalrialri; Kai kidremedremeli kwalrialri turamuru.

²³ Miaku ki alalingu luka miauawbu aru kawlrawlrau, miaku ki apapawku ka kiavisivisi si mucilri.

²⁴ Kai paculruli ngwalai ki talailaisane si kangilru kamamelre; kai kinawmasaneli marilai si turamuru.

²⁵ Ku wadrele nakwane ku umawmase mwalralralrakai nakwane makanaelre; kwi lalasu wavetevete ku awlru lini mulralrakai nakwane.

²⁶ Tamatama ka Twaumaseli, kiatubiaku muswane paralubaili; asi lwiyane yakai kwi kai maelaela ka sakialibakesu, kiatubiaku muswane palribulaili.

²⁷ Ani thingale ku labadhali, ala ka amanisu kudra palribulu nakwane.

²⁸ Kwi lalasu adravane pusupusu nakwane, patarumaaralringasu si subulrubulru nakwane. Ku twalisilisi nakwane ku umawmase ani amaki, kai sasiakawlusu lani kiraragai.

²⁹ Ku labadhali ani kiarubwane, mia ki sialaimai ku sapakabelebelengane sipalimemelre ku akiarubwanane.

³⁰ Lri akwadravaku kiaseasene ki Tamatama; lri ikaiyaku ki taiyelrelreane ki mapapangale drengedrengere iniane.

³¹ Asi lwiyane kwi lasu pwasakai ki matiakukuru ka umawmase, la palribulu iniane pakidaili ki lri tupasalriu si apapacadhane iya iniane ka umawmase.