Lasenai 108 - Ngudradreadrekadhane Ka Sisiu 魯凱語聖經Kiatubi ku akiparalubane ka inulri ( Lasenai 57.7-11 ; 60.5-12 ) Tusenai ki Davidi. 1 Twaumase, mapapedrenge kai kidremedremeli, kai nau lri lrudralrudrai; lri senadhaku, lri drengedrengeraku muswane! Kidremedremeli, ngidrakala. 2 Rugange, lebere, pacuna si ngidrakale! Lri mialriaku aceace ki vai pangidrakale! 3 Tamatama, lri ikaiyaku ki lakuni kiaseasene muswane; lri ikaiyaku ki sanaka umawmase drengedrengere muswane. 4 Ku palralrawthu ka sakialibakesu walribate subelebelenge; ku abelengane ki takapatengatengananesu wakela kavai talikaiyane ki ememe. 5 Twaumase, ku kiwsakenanesu ani utaluvaivai ikai subelebelenge; ku lrigusu ani salraelre kai kawmasane. 6 Kiatubi nai muswane paswalebea si palraingi naiane, arakaiya kwi pukusu palribulu naiane, lani kipalribulu kai kadalamesu ka kawkawlusu. 7 Ku Twaumase twalai ki Alrivilrivi ka taikaikaiyaneini kawriva: Lri kikaruburaku si akaci, si pawvagai ki swa Sekeme; lri malraku ka valrwalru Sukuthe si baai apavalavala ki kawkawluli. 8 Kavai Gileade yai nakwane, ku Manase laka mialri ka nakwane; kai Iparaime yai tagurunguli; kai Yuda yai lrekemeli ka ukudru. 9 Lri arakaiyaku ki Muabe tusaubanabanavane ka tarai, lai lri papiaku ki Idume verevera ku kece; lri papiaku ki swa Pelisitine senai putariri. 10 Twaumase, aneane kulri ililuku nakwane mudaane kai ki makecenge ka cekele? Aneane kulri ililuku nakwane mwa ka Idume? 11 Twaumase, tengaanengasu ka wacilringa naiane? Kaisu lri taelrenga ki kwapingi nai kikaruburu? 12 Kiatubi nai muswane paraluba naiane kiecebe ki badha, asi lwiyane ku paralubu ki umawmase kadrwa ku paluludane. 13 Ku Twaumase tapalra naiane, lri tara akaci nai; ku Twaumase lri tara paamaki ki labadha nai. |