Lasenai 107 - Ngudradreadrekadhane Ka Sisiu 魯凱語聖經

Mwasaka lrima ka hungu (Lasenai 107–150) Wadrengedrengere ku takamathaithariranenga ki Twaumase

¹ Kiaseasena ki Tamatama, amani ku mathaithariringa; ku sakialibakeini lri ikai palralrawthu.

² Kudra palribuluini ka laumawmase, apapelaelaela kikai sadrengedrengerane; ku Tamatama palribulu numiane pakidaili ki alrima ki badha,

³ twalai tali talrawane, sapakalriwgu, tali lrawdru, tali dradha, twalai ki lakuni ililuku numiane kainganai.

⁴ Yakai ku la amuli ikai ki takakadrwane ki umawmase calragulragu, kai maka kiadringai ku kadalranane ku samamwa ki cekele si ikaikai.

⁵ Kwi lalasu la ubaisi si kakadhame, kadruanga ku sidramane.

⁶ Lu ikai ki akwalriane, kwi lalasu kiatubi ki Tamatama, ku Twaumase la palribulu liniane pakidaili ki amatikurwane.

⁷ Ku Twaumase waililuku liniane ngukakai ki madringelrese ka kadalranane, pakeela ki aikaiyane ka cekele.

⁸ Kwi lalasu nai kiaseasene ki kai maelaela ku sakialibake ka Tamatama, la drengedrengere ku tapianeini ku matiasamali ka awngane.

⁹ Ku Twaumase pangwa kadhamane ngulwadhane ki makadhame ka umawmase, la pakane pakabucuku ki mwabaisi ka umawmase.

¹⁰ Yakai ku laumawmase ku wacekecekecekele ikai ki dradrimitane si apacadhane, la ki kerenge ki sakwalrialri ka kicikici;

¹¹ asi lwiyane kwi lalasu wabaebalre ku ladrekase ki Twaumase, si kai tarwamara ku bulru ki Abebeelengenga.

¹² Ku Twaumase pakwalri liniane ki takaungane, la karilainga ngikuruuane turamuru; kwi lalasu lu tubakebake, kadrwa ku umawmase ku wadulru paralubu.

¹³ Lu ikai ki akwalriane, kwi lalasu kiatubi ki Tamatama, la palribulu liniane pakidaili ki amatikurwane.

¹⁴ Ku Twaumase patwalai ki dradrimitane ka apacadhane ililuku liniane kainganai, si ngetele ku sakerengane liniane ka kicikici.

¹⁵ Kwi lalasu nai kiaseasene ku sakialibake ki Tamatama, la drengedrengere ku tapianeini ku matiasamali ka awngane.

¹⁶ Ku Twaumase wacwakenga ki lriwlu ka lrawlrawdru, si ngetelenga ku sadrukurane ka adreme.

¹⁷ Yakai ku laumawmase ku ngwalai ki pasalrivaneini si kacaeme, ngwalai ku ngilisianane ki kakwakudhaneini si kwalri;

¹⁸ kwi lalasu kai padulrunga ki akaneane, si padethenga ku apacadhane.

¹⁹ Lu ikai ki akwalriane, kwi lalasu kiatubi ki Tamatama, la palribulu liniane pakidaila ki amatikurwane.

²⁰ Ku Twaumase arakai ku vagaini pawdringai ki caemane lini, la palribulu liniane pakidaili ki apacadhane.

²¹ Kwi lalasu nai kiaseasene ku sakialibake ki Tamatama, la drengedrengere ku tapianeini ku matiasamali ka awngane.

²² Kwi lalasu nai papia iniane patarumara ku sakiaseasenane ka sapatarumarane, si arakai ku sakiraragadhane ka senai pelaelaela ku tapianeini.

²³ Yakai ku laumawmase ku ngwavarukuru ngukakai ki laveke, ikai ki laveke satalutalu cekecekele.

²⁴ Kwi lalasu wadrele ku tapiane ki Tamatama, la drele ku tapiane ki lasu ikai adringi ki acilai ka matisamaimali.

²⁵ Ku Twaumase sana drekase, twagengegenge ku valrigi, la ngibawbaalrulu ku bikabiki.

²⁶ Ku varukuru kiapubelenge, la kipulebe pwa ka adringi; ku matimukukuludrane pakaulrawnga ku garangane lini.

²⁷ Kwi lalasu walridrawdrawdrawnga, mia ki mabusuku; kwi lalasu kadruanga ku dulru lini tumane.

²⁸ Ikai ki akwalriane, kwi lalasu kiatubi ki Tamatama, la palribulu liniane pakidaili ki amatikurwane.

²⁹ Ku Twaumase payasadra ki maadrau ka valrigi, la paidrengere ki bikabiki.

³⁰ Kwi lalasu ngwalai ku taisadrane ki valrigi taidrengerane ki bikabiki la kiraragai; waililuku liniane mwa kudra ki lrika amwane si kasuliivate ka taisadrasadrane ki lavarukuru.

³¹ Kwi lalasu nai kiaseasene ku sakialibake ki Tamatama, la drengedrengere ku piaini ku matisamaimali.

³² Kwi lalasu nai ikai ki tayelrelreane ki mapapangale si pelaelaela ku takasanianganeini, la ikai ki takaigigiane ki laciwru drengedrengere iniane.

³³ Ku Tamatama paakameamealane ka kadaengane ki kadravane, si celrepe ku tamwalwaludrane ki berai.

³⁴ Ku karawmanenga ka kadaengane pakabalrithi atitimwane ka kadruanga ku wacebecebe ka kadaengane, asi lwiyane kwini yakaikai kwini ku laumawmase tangangangace.

³⁵ Ku laenaenai paabaibaiyu, ku kameamealane ka kadaengane la ikainga ku laberai ka acilai.

³⁶ Ku Twaumase wamalra ki lamasilrasilrau ka umawmase pasutelrai pikai kwini, la tucekelenga ku taingeane ka aikaikaiyane lini.

³⁷ Kwi lalasu twaumawmawmanga pawtaletaleke, duku ku budu, si ngiesadhane ku takitalekane.

³⁸ Ku Twaumase swabulrubulru baai ki kawkawluini, la tathathathanga ku lagagane lini; la padrimadrima aru kakalrakalra sikakathane ku lapulapu lini ku lawaudriwdripi.

³⁹ Sakabilrilinga ngwakai ku takidredredrepetane si akwalriane, ku kawkawlu ki Twaumase la pela kilrumai, kitusinalrelreme.

⁴⁰ Ku Twaumase la pathavungu ki twasinalreme dredredrepete liniane, si la paamuli liniane ikai ki takakadrwane ki umawmase ka calragulragu.

⁴¹ Ai ku Twaumase palribulu ki matiakukuru pakidaili ki sakwalrialri lini, ku lawacekecekele lini la mia ki lakiu edhale aru kakalrakalra.

⁴² Ku lamadringelrese ka umawmase sadrele kiararagai turamuru; ku lamanganganga ka umawmase la kameteemetenga nguvagane.

⁴³ Ku la ngiathingale ka umawmase ani pudriadringai drele kilakikai; kwi lalasu ani kilrialringau ku sakialibake ki Tamatama ka kai maelaela.