Lasenai 106 - Ngudradreadrekadhane Ka Sisiu 魯凱語聖經

Ku Twaumase arakai ku sakialibake marasikai ki kawkawluini

¹ Haliluya! Kiaseasena ki Tamatama, asi lwiyane mathaithariringa; ku sakialibakeini lri ikai palralrawthu!

² Aneane kulri dulru pelaela ku maadrau turamuru ku tapiane ki Tamatama? Aneane ku lri pakaelre drengedrengere iniane?

³ Ku paluludu ku drekaseini ku umawmase ala mwaesai turamuru! Ku sakamiya pwasakai ki dringelresane ku umawmase ala mwaesai turamuru.

⁴ Tamatama, lu marasikaisu ki kawkawlusu, kiatubiaku muswane ngulringavaili, si palribulu nakwane!

⁵ Kiatubiaku muswane padrelaili lu ngiradhekane ku pilrisu ka laumawmase, nai kisupilri ku sakiaragai ki kawkawlusu, si karededele ki umawmasesu putariri.

⁶ Mararamau nai ki cucungulane nai pasalriu makanaelre; manganganga nai makanaelre.

⁷ Ku cucungulane nai saikai Izipiti kai wathingale ku matisamaliane ku pia ki Twaumase; kwi lalasu marimuru ku tapapiane liniane ki Twaumase kingikaalrale padrelane ku sakialibake; kwi lalasu marimuru ku tapapiane liniane ki Twaumase kingikaalrale padrelane ku sakialibake; kwi lalasu yakai ki laveke Suize baebalre ki wadulru sanaka manemanenga.

⁸ Ai, ku Twaumase ngwalai ku apadrelane ku maadrau ka pukuini, la singikaaiyana ku nipukawnwanenga si palribulu liniane.

⁹ Ku Twaumase maelaelathe ki laveke Suize, ku laveke la makakaai kadrekare; la ililuku ki kawkawluini katwase lribate, mia ki ngwakakaikaai ki kameamealane.

¹⁰ Ku Twaumase palribulu liniane katwase ki magirimucu liniane ka umawmase; patwalai ki alrima ki badha palribulu liniane kainganai.

¹¹ Ai ku laveke wathene ki labadha; kadrwa ku natangeeanga ku waudripi.

¹² Ku kawkawluini ala kasalru ku pukawnungaini; si senai drengedrengere iniane.

¹³ Ai kwi lalasu padaalru la karimuru ku tapianeini; kwi lalasu kai mwabangalre mukalava ku takidremedremaneini.

¹⁴ Saikai calragulragu ubulane, kwi lalasu kadrwa ku tapalikaikaiyane ku murikaikai lini; sa ikai ki aenaenai, kwi lalasu kingikalrale kituthiathingale ki Twaumase.

¹⁵ La singikaai ku kitubi lini patarumara baai liniane, ai mialri pulebe ku caemane pikai liniane.

¹⁶ Ikai ki tasulasuladhane lini, kwi lalasu pathalra ki Musi, la kalavare ki saniange ka sasiakawlu ki Tamatama ka Arungu.

¹⁷ Ku kadaengane ala aegacane, si malra lrungulrungu ki Dathane; la selrepe ki Abirame si wacekecekeleini.

¹⁸ Yakai ku apwi ku mwalebe ikai ki kinawmasane ki la papalraini, si lama kwini ki lamanganganga ka umawmase.

¹⁹ Kwi lalasu yakai lregelrege kavai Sinai darepe tulwange, la pidruru sukubu papia ki nidarepane ara alrima ka samiamiange;

²⁰ kwi lalasu arakai kudra wakanekane ku ubulu ka nidarepane ka lwange, patwakamani ku lrigu ki Twaumase.

²¹ Kwi lalasu marimuru ki palribulu liniane ka Twaumase, marimuru ku taikaiyaneini kavai Izipiti pia ku maadrau ka awngane,

²² ikai kavai Hame la pia ku matiasamaimali, ikai laveke Suize la pia ku matiukukuludru ku awngane.

²³ Ku Twaumase lri amudaku ki kawkawluini sa iya, kudra pilrini ka sasiakawlu ka Musi papia iniane kidrikisi, la pangikusawlriane ku lisianeini, si mwalranga ku naika akiamudane ki swa Iseraylri.

²⁴ Ai kwi lalasu twadrekase kudra ki mathariri ka kadaengane; kwi lalasu kai masalru ku pukawnunga ki Twaumase.

²⁵ Kwi lalasu yakai adringi ki balrawbau kalisilisi, si kai mubangalre kilalra ku vaga ki Tamatama.

²⁶ Ngwalai kikai ku Twaumase pwadriadriingai pakipapawlringau liniane: Lri tara papacai liniane ikai ubulane,

²⁷ lai lri sarau ku lagagane lini ikai ki lakuni, kwi lalasu lai lri acaicaicali ikai ki maelane ka kuni.

²⁸ Sakabilrilanenga ku kawkawlu ki Twaumase ala ikaai kavai Biure sukubu ki Baale, la kane kudra sangupatarumaranenga ka sapatarumarane ki wapacai ka twaumase.

²⁹ Kwi kakwakudhane lini pakalisi ki Twaumase, ku matiukukuludru ka swalrubu la saela ikai liniane.

³⁰ Ai ku Pinehase ngiadrakale pathavungu ki pasalrivane lini, ala paidrengere ki swalrubu ku asaravane.

³¹ Kikai mathariri ka awngane kiangulringau ki umawmase, twalai kwini pakeela ki mwabaibalrithi.

³² Kwi lalasu mialri ikai thili ki berai kavai Miriba pakagirimucu ki Tamatama, la ngwalai kai pakwaalri ki Musi.

³³ Kwi lalasu pakwaalri ku kidremedreme ki Musi, lakamani ku kawrivanga ku nai kaika aiyane ku vaga.

³⁴ Kwi lalasu wabaebalre ku drekase ki Tamatama, kai papacai demedeme ki maelane ka zuku,

³⁵ ngiabaalrelringa mamwamwa karudrange liniane, si twalralrau ku kakwakudhane lini.

³⁶ Kwi kawkawlu ki Twaumase matwaselringa sukubu ki lasamiamiange, dawlu ku akamudaneini.

³⁷ Kwi lalasu papacai ki lalalake lini tusapatarumarane ka waudriwdripi baai ki twaumase ki swa Kanange.

³⁸ Kwi lalasu papacai ki kadrwa ku pasalrivane ka umawmase, la patueraerai ki lalalakeini, si patarumara ki samiamiange ki swa Kanange; kikai tapapacadhane wakudrulrunga talikai kwini.

³⁹ Kudra kakwakudhane lini ngiapakakudrulru, ikai cucubungu ki Twaumase pathaele si kai pangimianga.

⁴⁰ Ngwalai kikai, ku Tamatama papia ki kawkawluini kalisi; ku Twaumase papia liniane cebe ku valracevacane ka kidremedreme.

⁴¹ La malra liniane pikai ki alrima ki maelane ka zuku, kwi lalasu la kiruthuku ki labadha.

⁴² Kwi lalasu kiadredrepete kitusinalreme ki labadha, si ka kadruanga ku angilralraingane.

⁴³ Ku Tamatama kingikaalrale palribulu ki kawkawluini, ai kwini lalasu madadalame ngukakai ki abaebalreane ka kadalranane, arwa uthene mwa ki pasalrivane.

⁴⁴ Ai kwi lalasu sana kitubi, ku Twaumase la kilaalra; ku Twaumase makalithi ku sakwalrialri lini.

⁴⁵ Ngwalai liniane, ku Tamatama ngwalringau ku kiketeketeini; ngwalai ki sakialibakeini, ngwakusawlri ku kidremedremeini.

⁴⁶ Ku Twaumase pakakalithi liniane kudra ki waravase liniane ka umawmase.

⁴⁷ Tamatama ka Twaumase nai, kiatubiaku muswane palribula naiane. Kiatubiaku muswane patwaladha ki lakuni ililuku naiane siwlri kainganai, la nai dulru drengedrengere ku saniange ka naganesu, lani ka lrigu nai kiaseasene muswane.

⁴⁸ Drengedrengera ki Tamatama ka Twaumase ki swa Iseraylri! Twalai ku nadrumadrumadruma pakela lumamilringi! Sanaka umawmase ani masasilange iya kai: Amingi! Haliluya!