Lasenai 105 - Ngudradreadrekadhane Ka Sisiu 魯凱語聖經

Twaumase si kawkawluini

¹ Kunumi yai kiaseasena ki Tamatama, la pelaelaela pasalraelre ku takasaniangananeini; papia ki sanaka kuni pelaelaela ku tapianeini!

² Kunumi yai senadha drengedrengere iniane; pelaelaela ku matisamaliane ku piaini.

³ Kunumi yai lrigwa ku saniange ka naganeini. Sanaka kiatubitubi ki Tamatama ku umawmase ani kiraragai makanaelre.

⁴ Papia ki Tamatama kitubi ku akiparalubane; laka tasukusukubaana iniane.

^5-6 Mwabaibalrithi ki sasiakawlu ki Twaumase ka Aberahame, agagane ki pilrini ka Yakubu, ngwalringau madu ku matisamaliane ku tapianeini, ngulringava ku tapangimianeini saibange.

⁷ Amanini ka Tamatama, ka Twaumaseta; ku pukuini salraelre kai kawmasane.

⁸ Lri palralrawthu pangimia ku kiketeketeini; ku pukawnungaini lri pakela ki lamwabaibaibalrithi.

⁹ Lri tara pangimia ku pukawnungaini ki Aberahame, si pangimia ku kiketeketeini ki Isake.

¹⁰ Ku Tamatama si Yakubu wakelrete ku palralrawthu ka kakwakudhane, si cegecege ku palralrawthu ka samakaketeketaneini ki Iseraylri.

¹¹ Ku Twaumase amia kai: Lri patarumaraku baai muswane ka kadaengane Kanange, ka lrika tacekecekelanengasu.

¹² Kikwidra, ku tatathane ki kawkawlu ki Twaumase kai tathainu, yakaikaaiyana Kanange.

¹³ Kwi lalasu twalai ki taingeane ka kadaengane acaicali mwa ki taingeane ka kadaengane, la twalai ki vaeva ka kuni katwatwatwase mwa ki maelane ka kuni.

¹⁴ Ai ku Twaumase kai patwasinalrelreme ki sanaka umawmase liniane; ngwalai liniane pakiapapawlringau ki latalialalai.

¹⁵ Ku Twaumase amia kai: Madha pakwalrialri ki pilrili ka lasasiakawlu; madha kabebebetethe ki layuginsiali.

¹⁶ Ku Tamatama pakiapadradresenge ki kuni lini ku silravane, waretegenga ku taleke lini.

¹⁷ Ai siakawlu ki Yusepe paswala pasikai liniane padulru; ku Yusepe kiakilangai tuduri.

¹⁸ Ara kicikici ruthuku ki drapaleini, la ara adreme kateme ki lreini,

¹⁹ pakela ku tangimiane ku yugingini. Ku vaga ki Tamatama peaelaela ku takapatengananeini.

²⁰ Ku talialalai ki swa Izipiti la drekase pasiwlriwlriane pangilralraingi iniane; kudra warathudu ki lakuni ka talialalai la mukerengenga iniane,

²¹ si pakamaninga iniane marasikai ku awngane ki sihu, kwi lasu la rathudu ki kuni palraelre,

²² la baai iniane marasikai ki latabebelenge, patarumara iniane ku puku bulru ki la ngiathingale ka tarudrawdrange.

²³ Sakabilrilanenga ku Yakubu wamwa kavai Izipiti, si ikaikai kwini.

²⁴ Ku Tamatama parwakakalra ku umawmase ki kawkawluini, laka ngiraeradhekanenga ki badha lini.

²⁵ Ku Twaumase la alra ki kawkawluini pakikagirimucu ki swa Izipiti, si arakai ku apalrigilrigilane marasikai ki lasasiakawluini.

²⁶ Ala sikawlu pakatwase ki sasiakawluini ka Musi, si la sikawlu ki pilrini ka Arungu.

²⁷ Kwi lalasu wakaungu ku tapiane ki Twaumase ka maadrau ka puku, ikai Izipiti pwataluvaivai ku pinangu Twaumasane ka puku.

²⁸ Ku Twaumase la pakikabungu kai ki kadaengane ara dradrimitane, ku swa Izipiti la kai kilalra si pasalaladha ku drekaseini.

²⁹ Ku Twaumase la paerai ki sanaka acilai ki vaalru lini, si amudu patueelre ki sanaka kaange.

³⁰ Kwi kuni lini salraelre kerape ku latakurawru, adravane ka daane ki talialalai kai kialragau.

³¹ Ku Twaumase sa drekase, ngiapalai kela vunguvungu ku alralrangau, ku latulawlawngu la suete ikai kidruanga.

³² Ku Twaumase pwalebe ku kananu pawbalrithi ki udale, la salraelre kawmasane ku lrikace.

³³ Mabebetethe ki cebe ki labudu si icizike, si kadrulu ki yakai ki kadaenganeini sanaka angaatu.

³⁴ Ku Twaumase sana avavaga, wakela ngipalai vunguvungu ku laapapawku, ka thathathatha, kaika amaka asiasipane.

³⁵ Wakane demeedeme ikai ki kadaengane sanaka laacenge, la eleme sanaka taaleke.

³⁶ La papacai ki sanaka tinueapane ki dadaanane, si amudu ki la aswalalanga kitulalake liniane.

³⁷ Ala ililuku ki swa Iseraylri mailuku ku kingi si gingi katwase; kwi lalasu tangicaecaeme matisalru ku la kinawmasane lini makanaelre.

³⁸ Kwi lalasu sa katwase, ku swa Izipiti kiaragai turamuru, asi lwiyane kwi lalasu mwakuludru ki swa Iseraylri.

³⁹ Ku Twaumase arakai ku mathaariri ka ememe palakebe ki kawkawluini, lukamaungu la arakai ku apwi paledra liniane.

⁴⁰ Kwi lalasu lu kitubi, ku Twaumase pangiapalai kela ku latharingiebele ka adhadhame; la patwalai belenge pulebe ku akaneane pakabucuku liniane.

⁴¹ Ku Twaumase mwaelebe ki alrisapesape, la berai ku acilai; paavalru si mwalwaludru ku acilai ki meameale ka calragulragu.

⁴² Asi lwiyane ku Twaumase pwalringau ku saniange ka kiketeketeini, ka baaini pukawnu ki sasiakawluini ka Aberahame.

⁴³ Ala ililuku ki kawkawluini kiraragai katwase, kudra pilrini ka kawkawlu kiararagai senai makanaelre.

⁴⁴ Ku Twaumase wamalra ku kadaengane ki maelane ka zuku si patarumara baai liniane, kwi lalasu ala ucungulu ku laumawma ki palrapalra,

⁴⁵ pakai ku ani paluludu ku hulriceli amia ki kawkawluini, si pangimia ku padradrekaseini patuelre. Haliluya!