Lasenai 104 - Ngudradreadrekadhane Ka Sisiu 魯凱語聖經

Wadrengedrengere ki wabekace ka Tamatama

¹ Rili, drengedrengera ki Tamatama! Tamatama ka Twaumaseli, ala saniangesu turamuru! Sialaimaisu kwi matisalrwane si lrigu;

² siapalimemelresu ku ledra tusapakabelengane ka ebele. Wasapasu ku lepawngane, mia ki twadaane ku balrawbau;

³ yakaisu belenge ki taibelenge ki acilai tudaane ku taikaikaiyane. Arakaisu ki ememe tusakikaruburuburane ka palridingi, si ngukakai ki paridi ki valrigi ngipalai.

⁴ Twasasiakawlusu ki valrigi, la tusasiakawlusu ki lrikace.

⁵ Wacegecegesu ki kadaengane pikai belenge ki makecenge ka karwalai, laka palralrawlrawthu kai ngivelevele.

⁶ Wamalrasu ki laveke si pangimia ki ebele kabungu ki kadaengane; si palrenepesu ki acilai ki lalregelrege.

⁷ Sana kaelaelasu, kai acilai mawabebere; kai acilai sana kilalra ku drekasesu, malrungulrungu mwaludru patuelre.

⁸ Makalriwgu ki lalregelrege si mwaludru mwa ki lavalrwalru, la madredresenge irubu ikai ki tagiasanesu kelrete.

⁹ Wakelretesu ku pagisane, ku kaika adulrwane lribate, ku kaika alrenepane ki kadaengane.

¹⁰ Paberaisu ku acilai ki tacebeane la mwaludru mwa ki valrwalru, si ngipipipikiu ikai ki lalregelrege;

¹¹ ku lawalrawlrakwane ka waudriwdripi la ungulu ku acilai, la ngukadhamane ku yaubulane ka ruba.

¹² Ikai babiabila ki aciacilai ki angatu belenge, yakai ku laadhadhame isadra si senasenai.

¹³ Patwalaisu belenge paudale makakai ki lalregelrege; kai kadaengane swaete ku migemisu.

¹⁴ Pacebesu ki masalese ka ubulu, si lapu ki lanilapulapwane, la kadrau ku lalacenge, si pakane ki umawmase, ku lrika aikaiyane ki kadaengane kaungu pawtaleke ki umawmase:

¹⁵ Twabava si pakiraraagai ki kidremedreme, twabera si pakaidelrethe ki lringau, si kitaleke lapu ki kinawmasane paaru sapukwane.

¹⁶ Ku lredreke ki Tamatama ku cedare ka angatu ikai Lebanungu, kwaudale suete ku acilai.

¹⁷ Ku laadhadhame yakai kwini tulisisuku; ku kwange la ibelenge ki alrenge ka angatu tulisisuku.

¹⁸ Ku lakisisi yakaikai belenge ki lalregelrege; ku lasehuange kialepenge ikai ki lalilibi.

¹⁹ Wabekacesu ki dramare si kelrete ku dramadraamare; ku vai ngiathathingale ku alriwganeini lukamani lwigane.

²⁰ Wabekacesu ki maungu, si lu kadradrimidrimiti, ku yakai angatungatu ku lawaudriwdripi la makitu kainganai patuelre.

²¹ Ku yacengecenge ka raiyungu wagirigiringi muriakanekaneane, wasilasilape ku patarumara ki Twaumase ku akaneane.

²² Sana ngibwale ku vai la kilepenge, si apece ikai ki barungulu.

²³ Ku laumawmase matwase kaungu, si kwalrialri kai sacucugane pakela lukamaungu.

²⁴ Tamatama, kai bekacesu makalra turamuru! Kilakikai patuelre madru ki lrigilanesu; kai kawmasane swaete ku la bekacesu.

²⁵ Yakai ku laveke, la ikaikai ku la tadradrau tatitiki ka kaika asiasipane ku lapanianianiake,

²⁶ ku lavarukuru ngwakakaikai si masasawlriwlriwlri, ku bekacesu ku maadrau ka waudriwdripi ikai ki laveke yakai lawlawlangwi.

²⁷ Satalutaalu muswane patuelre, la singi kaai ku zikangesu baai liniane ku akaneane.

²⁸ Sana baaisu liniane, wakaane; lu patarumarasu ku akaneane liniane, la kabucuku.

²⁹ Sana katwasesu, la mukuludru; lu sawlrisu ku niake, la pacai, si siwlri adae.

³⁰ Ai lu papiasu liniane ipi ku niake, kiariimu panianiake; la parwa ka bavanesu ki kadaengane.

³¹ Ku lrigu ki Tamatama ani ka palralrawthu ikai! Ku Tamatama ani kiraragai kadalame ku bekaceini!

³² Ku Twaumase lu paswa lebe drele ki kadaengane, manwagiligili kai daedae; lu sulrape ki lalregelrege, kiarimu tuebebelre.

³³ Ku tapanianianiakaneli lri drengedrengeraku ki Tamatama; sana panianianiakeanaku lri drengedrengeraku ki Twaumaseli.

³⁴ Ku Tamatama ani kadalame ku senaili, asi lwiyane ku kiragaragaili twalai iniane.

³⁵ Ku pasalrisalriu ka umawmase ani twalai ki kadaengane kamudu; ku tangangangace ka umawmase ani kai adrelanenga. Rili, drengedrengera ki Tamatama! Haliluya!