Lasenai 103 - Ngudradreadrekadhane Ka Sisiu 魯凱語聖經

Sakialibake ki Twaumase

Tusenai ki Davidi.

¹ Rili, drengedrengera ki Tamatama! Akaelrea ku kinawmasane si kidremedreme drengedrengere ku saniange ka naganeini!

² Rili, drengedrengera ki Tamatama, madha karimurimuru ku sakialibakeini.

³ Pacepe ki pasalrivaneli patuelre; la sulrau pawdringai ki caemaneli patuelre.

⁴ Palribulu nakwane pakidaili ki apacadhane; arakai ku kalithane si sakialibake thalringulu nakwane.

⁵ Arakai ku makaelaela ku mathariri ka lamanemane pangulwadhane nakwane, laka taicengeceenganeli, ngiesadhane ku kinawmasane mia ki takanga.

⁶ Ku Tamatama pwasakai ki kiadredrepete ka umawmase; pwasakai liniane ku dringelresane.

⁷ Ku Twaumase papia ki Musi padrele ku kikakeini, la padrele ki swa Iseraylri ku maadrau ku tapianeini.

⁸ Ku Tamatama yakai ku migemi, swaete ku kalithane, kai maliisi cacapange, swaeteane ku sakialibake.

⁹ Ku Twaumase lu kaelaela la kai kawlawlai; lai kaika tapikaiyane ku lisiane.

¹⁰ Kai singiakai ku naika awcuganeta si pathavungu mitane; la kai ngwalai ku tapasalrivaneta si pawcugu mitane.

¹¹ Ku takathaininwane ku tamadadailane kai belenge si lebe, papia ki mwasakene ukuludru iniane ku umawmase, miyaiya ku adravane ku sakialialibakeini.

¹² Ku takathaininwane ku tamadadailane kai talrawane si sapakalriwgu, ku tamalraneini apadadaili mitane ki pasalrivaneta miyaiya ku tamadadailane.

¹³ Ku tapangimiane ki tama lu kilibake ki lalalake, ku Tamatama mialri pangimia kilibake ki mwasakene ukuludru iniane ku umawmase.

¹⁴ Ku Twaumase wathingale kai kinawmasaneta; la pulringau mitane ka dae sikakathane.

¹⁵ Ala kuta, kai niaketa mia ki ubulu. Miyaiyata ki yaubulane ka labengelrai ngiesadhane cebe;

¹⁶ sana kivaivalrigi maulrau, kadrwanga ku umawmase ku peaela drele iniane.

¹⁷ Ai ku Tamatama palralrawthu kilibake ki mwasakene ukuludru iniane ku umawmase; ku dringelresaneini lri pakela ki mwabaibaibalrithi,

¹⁸ ka amani kudra pangiamiamia ku takiketeketaneini, si kapatengatengane paluludu ku padradrekaseini ku umawmase.

¹⁹ Ku Tamatama yakai belenge cegecege ku taetalane; atalialalai si rathudu sanaka manemanenga.

²⁰ Magarange sapukwane ka lasasiakawlu belenge, drengedrengera si lrigu ki Tamatama; kudra pasalalaladha ku drekaseini, si palululudu ku takidremedremaneini ka lasasiakawlu,

²¹ ikai belenge sanaka yakaai ku puku, si pangiamiamia ku takidremedremaneini ka lasasiakawlu, lri drengedrengere numi ki Tamatama makanaelre!

²² Kunumi ka nibekacane makanaelre, drengedrengera ki Tamatama. Ikaiya ki tarathudaneini sanaka inininunga si drengedrengere iniane! Rili, drengedrengera ki Tamatama!