Lasenai 102 - Ngudradreadrekadhane Ka Sisiu 魯凱語聖經

Inulri ikai ki akwalriane

Inulri ki kwalrialri ku kidremedreme ka laumawmase papia ki Tamatama .

¹ Tamatama, kiatubiaku muswane kilalra kai inulrili; kiatubiaku muswane kilalra kai lingau kai kitubili ku akiparalubane.

² Ikai ki takwalrialrianeli ka vai, madha mubebere kai kithathengete nakwane. Lu kitubiaku, kilalraili, makakaiya tubalre nakwane!

³ Kai niakeli mia ki ebelre kawlrau; kai kinawmasaneli mia ki talabwane kudaladalai.

⁴ Kai kidremedremeli mia ki rudaedame ka ubulu ki dredre kaburau; adravane ka akaneane kainaku padulrunga.

⁵ Wadangaku; ka acaculrawlralenga kai kinawmasaneli palraelre.

⁶ Miaku ki yaubulane ka adhadhame; miaku ki kwici ka yakai ki kinaburukane.

⁷ Kainaku maka masipelrenge; miaku ki vaeva ka rulungu ikai talrugulrugane kasepesepele.

⁸ Ku labadhali twarakete ku vai kaelaelaela tusinalrelrelreme nakwane; kudra twasinalrelrelreme nakwane ku umawmase wapusupusu ki naganeli.

^9-10 Ngwalai ki lisianesu si elathanesu, wakaneaku ku abu talabwane, mia ki wakanekane ku aga, la ungulu ku maibu ki lrese ku sawngulane. Wacidingi nakwane, la pwa cagecage nakwane.

¹¹ Kai niakeli mia ki alalingu luka miawaubu; miaku ki marudamenga ka ubulu.

¹² Ai Tamatama, palralrawthusu gemegeme ku puku; pakeela ki mwabaibalrithi lrika palralrawthu ngulringau muswane.

¹³ Ngidrakala, la kakalitha ki Ziyungu; asi lwiyane ku akakalithanesu iniane ku vai wakelanga, kaiasasane mabeanga.

¹⁴ Adravane kikabebetethenga ka Ziyungu, kai sasiakawlusu madaalameana iniane; adravane atawlrakavanenga aubulane, kwi lalasu makaalithiana taulra iniane.

¹⁵ Sanaka kuni lri musakene mukuludru ki Tamatama; kai kawmasane sanaka talialalai lri mukuludru ku pukuini.

¹⁶ Ku Tamatama lu pasiwlriwlriane ka Ziyungu, lri padrele ku lriguini.

¹⁷ Lri kilalra ku kitubi ki matiakukuru ka umawmase; kai lri tudreadrekase ku inulri lini.

¹⁸ Pasikaiya ki mwabaibalrithi pacase ku takaungane ki Tamatama, lani thingale si drengedrengere iniane kudra la kaiyana kiatulalake ku umawmase.

¹⁹ Ku Tamatama twalai ki abebeelengenga ka Alrivilrivi ka taikaikaiyane paswa lebe drele; twalai ka belenge dredrele kawmasane.

²⁰ Ku Twaumase kialalra ku la daange ki kiaemenge; mwaelebe ki kiatupasalrivane ka apapacadhanenga ka umawmase.

²¹ Lakamani, kai umawmase lri ikai Ziyungu pelaelaela ku nagane ki Tamatama; kwi lalasu lri ikai Yerusalrime drengedrengere iniane.

²² Lukamani kwidra, sanaka kuni lri irubu taelre; sanaka umawmase lri masiasilange sukubu ki Tamatama.

²³ Sa icengecengaku, patwaramuru nakwane ku Tamatama; arwa tuedrekane kai niakeli.

²⁴ Twaumaseli, madha papacapacai nakwane. Tamatama, ku vaisu kadrwa ku talikaiyane.

²⁵ Wabekacesu ki kadaengane saka nadrumadrumadruma; ngiakakamanisu bekace kai subelebelenge.

²⁶ Lri kawlrau patuelre, lai lri ikaaisu apalralrawthu; lri mia ki laimai kapurici. Lri pabalrithisu belenge si lebe, mia ki kiapabalrithi ku laimai; kai belenge si lebe lri kawlrau patuelre.

²⁷ Ai, lrika sakamiyasu kai kaelaela; ku vaisu kadrwa ku talikaiyane.

²⁸ Ku lagagane nai lri kisupisupilri ku angiesadhanane; ikai ki tapalakebanesu, ku mwabaibalrithi lini lri ngiradhekane.