Lasenai 101 - Ngudradreadrekadhane Ka Sisiu 魯凱語聖經

Pukawnu ki talialalai

Tusenai ki Davidi.

¹ Lri drengedrengeraku ku sakialibakesu, ku dringelresanesu; Tamatama, lri drengedrengeraku muswane.

² Lri kicawcakwanaku ngukakai ki kiatulrepenge ka patengatengane ka kadalranane; lri kelasu nakwane kai lwigane? Lri ikaiyaku ki daane ki talialalai kabula ku tapanianiakane;

³ kainaku lri palraingi ki ngialisiane lutuumane. Mavalracevacaku ku kakwakudhane ki wabaebalre ki Twaumase; kainaku lri kipakakudrulru kipangilisiane ki lalasu lutuumane.

⁴ Lri kidailaku ki kai madringelrese ka kadalranane; kainaku lri kisaela ki la atumaanane ki ngialisiane.

⁵ Lri amudaku ki kiabububuli tulilisi ki talragilragi ka umawmase; kainaku lri maka tarumara ki ngiakalrilrigu ngitatwadrau ka umawmase.

⁶ Lri kakalithaku kudra ki patengatengane ku kidremedreme papia ki Twaumase, lri pikaiyaku liniane ki daaneli ka talialalai; ku kiatulrepenge kapatengatengane ka umawmase lri marasikaikai nakwane.

⁷ Ku madraedrangelre ka umawmase kai lri dulru ikai ki daaneli ka talialalai; ku la ngiakathaithaithariri kai lri maka acegecege ikai cucubungu nakwane.

⁸ Luka mialrealre ki vaivai lri tara amudaku ku manganga ka umawmase ku yakai ki kuni; lri patwaladhaku ki cekele ki Tamatama pakatwase ki manganga ka umawmase makanaelre.