Lasenai 10 - Ngudradreadrekadhane Ka Sisiu 魯凱語聖經

Kiatubi ku akipalribulane ka inulri

¹ Tamatama, asu kidailinga turamuru naiane? Asu kai kakalikalithi naiane sa kwalrialri nai?

² Kai tangangangace ka umawmase ngiakalrilrilrigu, dredredrepete ki matiakukuru ka umawmase; kwi lalasu ani mulravathane ki lravathe lini.

³ Ku tangangangace ka umawmase ngialralrigu ku ngilisianane ku kidremedreme lini; ku marau ka umawmase kiaecebe si tudrekase ki Tamatama.

⁴ Ku kidremedreme ki tangangangace ka umawmase wadradrarane, si kai kitubi ki Twaumase; ikai ki kidremedremeini kadrwa ku Twaumase.

⁵ Lu twatumane kai tangangangace ka umawmase masulivate patuelre. Kai wathingale ku sasaibangane ki Twaumase; mwalralrakai ki sanaka badhaini.

⁶ Lu kidremedreme: Kainaku lri amaki palralrawthu; kai tapanianianiakaneli ikai kawmasane lai kainaku lri kipadradresenge ku amatikurwane.

⁷ Kwi lasu swaete ku apuswane, adraedrangelrane, akukuludrane, ku kawrivarivaini sapapacai, ngialisiane patuelre.

⁸ Kwi lasu yakai ki cekele lepenge; mwakalava ku apapacadhane ki kadrwa ku pasalriu ka umawmase. Walili drele ki kadrwa ku asatalwane kiparalubu ka umawmase,

⁹ mia ki raiyungu ka walepenge ikai kapaidridringane. Kwi lasu mwakalavalava ku apwalrane ki matiakukuru ka umawmase, si arakai ku lravathe pulravathane iniane, la ravase iniane.

¹⁰ Ku matiakukuru ka kadrwa ku tamwane sidruru twabakebakenga; puku ki ngialisiane ka patwabakebake liniane.

¹¹ Ku tangangangace ka umawmase ngiaiya kai: Ku Twaumase kai wathethethengete kilakikai! Wamemecane, palralrawthu kai maka drele nakwane!

¹² Tamatama, kiatubiaku muswane bwala palribulaili! Twaumase, madha karimurimuru ki la kiadredredrepete ka umawmase!

¹³ Kai tangangangace ka umawmase twadreadrekase ki Twaumase, amia kai ku kidremedreme: Kai lri pathavungu nakwane?

¹⁴ Ai wadrelesu patuelre, si kakalithi ku kwalrialri ki umawmase; lri kaisu susu ku apalribulane. Ku matiakukuru ka umawmase ka kadrwa ku lri paralubu iniane lri satalu muswane; asi lwiyane taparaluubanesu ki pakulrulrulu si walibakane ka kadrwa ku tapapiane sidruru ka umawmase.

¹⁵ Kiatubiaku muswane baburava ku puku ki tangangangace ka umawmase; kiatubiaku muswane pathavunga ki tapasalrivane lini, si pudriadriingai dungudungu!

¹⁶ Ku Tamatama palralrawthu atalialalai magagemegeme ku puku; ku sakamaelanane ka zuku lri twalai ki kadaenganeini kamudu.

¹⁷ Tamatama, kilalra ku la kitubi ki matiakukuru kwalrialrialri ka laumawmase; lri patarumarasu baai ku garangane liniane.

¹⁸ Pusakaiya avavaga ki kiadredredrepete ka laumawmase si lapakulrulrulu, kudra lri tara kaburau ka umawmase lani kai capangenga kukuludru ki palrapalra.