Lasenai 1 - Ngudradreadrekadhane Ka Sisiu 魯凱語聖經Aswalalanga ka hungu (Lasenai 1–41) Patengatengane ka yakai ku akaesadhane ka umawmase 1 Kai kialalralalra si pasalaladha ku tapadrekadrekasane ki manganga ka umawmase, kai twapalrapalra ku tapudrapalane ki pasalrisalriu ka umawmase, kai kiarederedelane ki siadreadrekase ki Twaumase, luka miyaiya kai ku umawmase patengatengane ka yakai ku akaesadhane. 2 Kwini lasu kathane ki hulrice ki Tamatama ku akulini, ki vaiyane ki maungu la pikidremedreme silrilrilrigu kai kidulrudulru. 3 Kwini lasu mia ki nipatalulane lredreke pikai babiabila ki vaalru ka ivai, la singikaai ki kalamanemanane pumadru, ku vasau kai malrailraici. Ku piapiaini ku awngane masulialialivate! 4 Ai ku tangangangace ka umawmase kaika ngimiyaiya kikai: Kwini lalasu mia ki lrapi ka kiapalai ki valrigi. 5 Ku tangangangace ka umawmase lri kitupasalrivane ki Twaumase; ku pasalrisalriu ka umawmase lri kipatwalai ki tayelrelreane ki madringelrese ka umawmase kipakatwase. 6 Ku Tamatama makalithi ku tangukakaiyane dadavace ki madringelrese ka umawmase; ai ku tangangangace ka umawmase matwatwase papia ki akamudane. |