Kulusia 4 - Ngudradreadrekadhane Ka Sisiu 魯凱語聖經

¹ Ku atawki ka laumawmase, kunumi aparamaramava papia ki laduri, asi lwiyane wathingale numi, ikai subelebelenge mialri ikai ku tangeea ku Tamatama numi.

Sapakisamulane bulru ka vaga

² Lu inulri numi yai warututu madu, si la kipapawlringalringau, papia ki Twaumase la pikaiya ku kiaseasenane ku kidremedreme.

³ La pasikaiya naiane inulri, kitubi ki Twaumase ku apasikaiyane naiane muelebe ku apelaelane kai hukuingi ka lrawlrawdru, ani pasalraelre ku kaika athingalane ka matiasamaimali ki Kirisitu. Kwaku kaiasasane ngwaladhaku ki kikai ki awngane si kiemenge.

⁴ Pasikaiyaili inulri, la nau pakaelre ku takipuawngananeli si padrelane kikai kaika athingalane ka matiasamaimali.

⁵ Lu makisudawdalru numi ki kaika sinzia pikaiya ku lrigilane, la kai pasawlra ku zikange.

⁶ Lu kawrivane akwasulrapele madu si matidadalame, thingala tubalre ku sanaka la matikai lini ku mendai.

Bibiilrilinga ka sakipusawane

⁷ Kai tangimiamianeli ikai kai patuelre, kai kadalameta ka Tikiku lri nguvavaevanga pelaela numiane. Kai lasu kiasamula ka tarakawaungu, ikai ki apasikaiyane ki Tamatama kaungu thadalrane nai ka asasiakawlu.

⁸ Pawakalrivilaku iniane pamwa numiane kwini, pelaela ku tangimiamiane nai ka swakai kai, ku lrika asapukwanane numi.

⁹ Ku papalraini katwase yakai ku pakaelre ku takidremedremane ka Unisimu; kai lasu swakai numiane kwini ka umawmase. Kwi tadrusa lri pelaela kai taikaiyane nai kai patuelre numiane.

¹⁰ Kai palrali kiemenge ka Arisetarekuse aii amiamia numiane. Kai kadralra ki Barenabase ka Maruku la mialri aii iyaiya numiane. (Pangukai ki Maruku, peaelaelangaku, alaiyasi mwa numiane kwini, pasudalruanga iniane.)

¹¹ Kai Yesua ka kiapasi Yusetu la mialri aii iyaiya numiane. Ikai ki sinzia ki swa Yuda, kathane kai tatulru ka papalrali kawaungu pasikai ki kuni ki Twaumase, papia nakwane maadrau turamuru ku taparalubane.

¹² Kudra twalai numiane kela ka Ipahurase aii amiamia numiane; kai lasu mialri ka sasiakawlu ki Yesu Kirisitu. Tainulrinulriane pasikai numiane, kitubi ki Twaumase pakakecenge ku salrwane numi, kamani ku mabea ka Kirisite, si kitulrepenge pasalaladha ku kidremedreme ki Twaumase.

¹³ Kai lasu pasiakai numiane, la pasikai ki swa Lawdikia si swa Hirapuli ka laretesaneta kwalri kaungu, lri dulrwaku pelaela ku tapiane lini.

¹⁴ Kudra kadalameta ka Luka ka tarasulrasulrau si Dima aii amiamia numiane.

¹⁵ Atalingikaiyanga naiane aii iya ki laretesaneta ka swa Lawdikia ki Nemepa si kwidra yakai ki daane lini ka kiwkai.

¹⁶ Lu maka silrigunga numi kikai tigami, patululanga baai ki swa Lawdikia kiwkai pasilrigu, si la mialria silrigu kwini twalai ki Lawdikia kiwkai kwi baai numiane kwi tigami.

¹⁷ Si la pelaela ki Arekipuse, kudra tarumaraini ku apasikaiyane ki Tamatama kaungu ani tara kisamula tulrepenge.

¹⁸ Amaniaku ka ngiapapacase, “Kwaku ka Pawru anu mudringadringai amiaku!” Madha karimurimuru masasiasakerenganaku kai kicikici! Ku Twaumase ani baai numiane ku migemi.