Kulusia 3 - Ngudradreadrekadhane Ka Sisiu 魯凱語聖經

¹ Twapapalranga numi ki Kirisitu sielane, kunumi tara kisamula kisilape ku awngane subelebelenge, ikai kwini, ku Kirisitu wanene ikai tali vanale ki Twaumase ka taetalane.

² Kunumi salikavaeva ku kidremedreme papia ki awngane subelebelenge, kaika awngane kai kawmasane.

³ Asi lwiyane twapapalranga numi ki Kirisitu pacai, ku niake numi twapapalranga iniane ka nibaladhanenga ikai adringi ki Twaumase.

⁴ Ku Kirisitu amani ku patengatengane ka niake numi, lu adrelane, lri mialri numi tupapalra iniane adrelane, si kisupilri ku lriguini.

Supilri si bavane ka niake

⁵ Lakamani, kunumi tara papacadha kwini yakai ki kinawmasane numi ilililuku kudra la ngwakai kawmasane ka urikaiyane ki kidremedreme, amani kilakikai wacapange ki sawvalai si ababai, matiadingeselre, ngialisiane ka urikaiyane ki kinawmasane, malisi ka takidremedremane, si ravane (kai ravane taingeane ka wasukubu ki samiamiange).

⁶ Ngwalai kilakikai, ku elathane ki Twaumase lri mulebe mwa kwidra ki kai pasalaladha iniane ka laumawmase.

⁷ Kunadruma miyaiya numi ka napanianianiake ikai ki miyaiya kai ku takidremedremane, si kiilililuku liniane.

⁸ Ai, kaiasasane kunumi tara cilria kilakikai, madha ikaikainga: ku elathane, girimucane, si lisiane, madha iyaiya ku atulilisiane, ku makudrulru ku vaga.

⁹ Madha matavuvuvulrucu, asi lwiyane mwalranga numi kudra takasupilraneli si supilri ka kakwakudhane,

¹⁰ silaimai kudra takabavananeli. Kikai takabavananeli, twalai ki wabekace ka Twaumase ngipapatwalrau ku tangimianeini kai karetege ku abavane, si dulru maka thingale iniane.

¹¹ Lwiyane kai kawriva, kadrwanga ku tamakakitukudhane ki swa Gurike si swa Yuda, kai lri ikainga ku tamakakaelane ku kiagelregelre tulrisi, si kai kiagelregelre tulrisi, ku kaina akabalrithi ku kakwakudhane, kudra duri si ngialralrainginga ka umawmase. Ku Kirisitu yai amani patuelre, ku Kirisitu waelrelre patuelre.

¹² Ku Twaumase kialibake numiane, la pilri numiane ngitatu alrivilrivi ka kawkawluini. Lakamani, kunumi yai pikaiya ku kalithane, ku sakialibake, ku ngisasangatane, ku sulrapelane, si sakiadiadili ku kidremedreme.

¹³ Lu ikai ku rivwane masingiakaikai madu, si mapaceacepe; ku tapiane pacepe ki Tamatama numiane, kunumi pangimia ki palrapalra.

¹⁴ La kaika kathane kikai, silaimadha ku sakialibake, asi lwiyane kai sakialibake yai amaanilringa ku apadawdaruru ki kiatulrepenge ka kakwakudhane.

¹⁵ Ku baai ki Kirisitu ku rathudane lri kamani ku a Tamatama ikai ki kidremedreme numi, paakai ku aikaiyane ku rathudane numiane, wapilri numiane ku Twaumase, si kavaevanga ka kinawmasane. Kunumi la kiaseasena.

¹⁶ Ku hukuingi ki Kirisitu pasuetea pikai ki kidremedreme numi palralrawthu. Arakaiya ku makaelaela ku lrigilane mabulrubulru, la arakai ku senai, ku sanbika, ku senai ki abake, si patwalai ki kidremedreme kiaseasene drengedrengere ki Twaumase.

¹⁷ Adravane ka atumanane ku manemane, ku aiyane ku manemane, pangukaiya ki nagane ki Tamatama ka Yesu patuelre kiaseasene ki Tama ka Twaumase.

Bavane ka tamangimiamiane ki umawmase

¹⁸ Ku taelrelre ka ababai, kunumi yai pasalaladha ki taelrelre numi ka sawvalai, asi lwiyane kikai yai apiane ki Kirisite.

¹⁹ Ku taelrelre ka sawvalai, kunumi yai kilibaka ki taelrelre numi ka ababai, madha tusinalremelreme liniane.

²⁰ Ku lalalake, kunumi yai kilalra ki marudrawdrange numi, asi lwiyane kikai yai apiane madu ka sinzia, ka kiragai ki Tamatama.

²¹ Ku marudrawdrange, kunumi madha ceneceneke ku kidremedreme ki lalalake numi, amani lu kasulri si kasekelrame.

²² Ku aduri ka laumawmase, kunumi kilalra pasalaladha ki ngwakawmasane ka latawki numi. Ku pia numi kikai kai numi ka paiya padrele ki tawki numi sikakathane, si kikiragai liniane, patwalai ki patengatengane ka pasingikidremedreme, asi lwiyane mwasakesakene numi mukuludru ki Tamatama.

²³ Adravane pia numi ku manemane, salikavaeva ku kidremedreme, mia ki pasiakaikai ki Tamatama kaungu, ka kaika pasiakaikai ki umawmase kaungu.

²⁴ Thingala ku Tamatama lri tara baai ku pakalreva muswane, lri tarumarasu ku pikaikaini pasikai ki laumawmaseini. Ku pasikaikai numi yai Tamatama ka Kirisitu.

²⁵ Kudra paiyaiya ku ngialisiane, adravane ka aneaneane, lri tarumara makanaelre ku sabilriane, asi lwiyane ku Twaumase lri arakai ku maramaramau ka lekete, si aparamaramau ku tamarasikaiyane ki sanaka aneanenga.