Kulusia 2 - Ngudradreadrekadhane Ka Sisiu 魯凱語聖經

¹ Anatumane la thingale amiaku numiane, ngwalai numiane si swa Lawdikia, si kwini takalra ku kai naka dreleli ka laumawmase, lri pakaelre kai kidremedremeli kai pukuli kaungu.

² Lri pakalrumalaku liniane, ku arakaiyane ku sakialibake karathudu, yakai ku twalai ki tadrelane si thingale la pacebe ku salrwane, si thingale ku ngwakai ki Twaumase ku kaika athingalane ka matiasamaimali, kikai kaika athingalane ka matiasamaimali amani ku Kirisitu.

³ Amani ku mwaelebe ku sekete ki Twaumase patuelre ku lrigilane si thingalane ka sukusuku.

⁴ Kai iyali kikai, amani lu kipamama numi ku lrigilane ki sanaka umawmase.

⁵ Adravane kai ikai numiane kwini kai kinawmasaneli, kai kidremedremeli yakai taelre numiane. Kiaragadhaku turamuru, drele ku tapasalaladhane numi ki kakudhane, si ku takisuswane numi ki Kirisitu la kapapedrenge ku karwalai.

Ikai adringi ki Kirisitu kiatulrepenge ku niake

⁶ Ku tarwamaranga numi ki Yesu Kirisitu tu Tamatama, ku tapanianianiakane numi tara sitangadrana iniane,

⁷ ikai iniane adringi tubalace, kaadrau, paacegecege ku salrwane, paiya numi kikai ku takibulrwane numi. La mialria pasuetea ku sakiaseasenane ku kidremedreme.

⁸ Kunumi yai dradreela, madha kipamamama kudra kaika patengatengane ka lrigilane ngukawmasane, asi lwiyane kwini ngwakai kwini ku niyane yai umawmase ka wabulru, ka patwalai kudra ki ri ki latariau niyane, ka kai patwalai ki Kirisitu.

⁹ Asi lwiyane ku Twaumase ku takitulrepengane ku taka Twaumasaneini tengatengane ikai adringi ki Kirisitu.

¹⁰ Kunumi laka kiaparaisi numi ki Kirisitu, si tarumara ku ngiaradhekane ku niake. Amani ku abebeelengenga, ka walribate patuelre ki warathudu si magagemegeme ku puku ki ngwakai ki la abake.

¹¹ Kunumi kiagelregelre numi ki tulrisi ikai adringi ki niake ki Kirisitu, kikai takigelregelrane tulrisi kaika pia ki umawmase, amanini ka wamalra numiane patwalai ki pasalrivane ki kinawmasane pulatadre ka kiagelregelre ka lrisi.

¹² Asi lwiyane, sa kipabanau numi, twapapalra numi ki Kirisitu kidralreke, sa kipabanau numi, laka ngwakai ki salrwane kwidra ki puku ki amani ku pasiaela iniane ka Twaumase si tupapalra iniane siela.

¹³ Kunadruma, ngwalai sa ikai ku pasalrivane numi, si kaamani kwidra kadrwa ku hulrice ka sakamaelanane ka umawmase, kunumi ikai ki kinawmasane wapacainga numi. Ai, ku Twaumase pakiaredelane numiane ki Kirisitu peela panianiake. Pacepe patuelre ku tapasalrivaneta,

¹⁴ si mwalra kudra nai tulisi mitane, si nipacasane ka wakerenge mitane ka pasalrivane, la pwa ki ziwzika kedrekedre, si cilri iniane.

¹⁵ Ikai belenge ki ziwzika, ku Kirisitu ngiakakamani ka mwalra kudra puku ki amani ku warathudu si amani ku magagemegeme ku puku ikai ki ngwakai ki abake, la ala liniane ravase si pucucubungu ki mapapangale putaritariri.

¹⁶ Lakamani, madha kiarakaikai ku nitukakudhanane ku pacase ki umawmase si ruthuku numiane ki ngwakai ki akaneane numi, ki lrisi, ki bavane ka dramare, ki Taisadrasadrane ka vai.

¹⁷ Ki kikai patuelre alalingu ki angimiane lukabibilrili, ku Kirisitu ala amani ku tengatengane ka kinawmasane.

¹⁸ Kwidra makeecenge ikai ku maelane ku tadrelane la ranau ngisasangate, sukusukubu ki sasiakawlu belenge kudra laumawmase madha pakamanimani ku lri pasakawlrau ku naika akipakalrevane numi. Kwini lalasu singiakai ki kaika patengane ku kidremedremane, kadrwa ku tatakaiyane si la ngikararakace ngitatwadrau,

¹⁹ ku tamararaisane ki abebeelengenga ka Kirisitu mabetakenga. Ku patengatengane, kathane lu twalai ki awlru, amani ku Kirisitu, ka lri dulru lapu ki kinawmasane patuelre, satalu ki pararegeregane si uvace, si marairaisi, la singikai ki kidremedreme ki Twaumase aru suai kadrau.

Twapapalra ki Kirisitu panianiake pacai

^20-21 Kudra twapapalranga numi ki Kirisitu pacai, si kidailinga numi kwidra ki ri ki latariau, kunumi anu ka thadalraneana ki ngwakawmasane ku tapanianianiakane numi, pacungucungulwana pangimia “Madha velevele kikai”, “Madha palalava kavai”, “Madha ecenge kikai” kilakikai nitutawlrisianane?

²² Kikai miyaiya kaika lamanemane sana kiarakai kadrwanga, asi lwiyane twalai ki tukakudhane si sabulrwane ki umawmase.

²³ Lu ngubebelengane drele, ku wasukubu ki sasiakawlu belenge, ku waranau ngisasangate, pakwalri ki kinawmasane ini kikai la miyaiya kai, miakau malrigili ku tapiane, ai ku patengatengane, papia ki aruthukane ki urikai ki beate ka kadrwa ku palululudane.