Kulusia 1 - Ngudradreadrekadhane Ka Sisiu 魯凱語聖經

¹ Kunaku ka Pawru, pangwakaiyaku ku kidremedreme ki Twaumase ka nisikawlane ki Yesu Kirisitu. Tadrusa nai ki Timuthi

² tigami numiane ka yakai Kulusia ka sinzia, kamani ku yakai adringi ki Kirisitu ka patengane ku kidremedreme ka laretesane. Ku Tamaita ka Twaumase ani baai numiane ku migemi si sulivatane!

Kiaseasene ka inulri

³ Lu pasikai nai numiane inulri, takiaseaseenane nai ki Twaumase, ka amani ku Tama ki Tamatama ka Yesu Kirisituta.

⁴ Asi lwiyane kialalra nai ku salrwane numi ki Yesu Kirisitu, kialibake numi sanaka sinzia.

⁵ Sakapathagilane, ku hukuingi sadaruru numiane kwini, kialalra numi ku mailuku kai ki hukuingi ku sidramane. Lukamiyaiya kai, kwi salrwane si sakialibake numi siatangadrane kwidra nipasikaiyane numiane pikai belenge ka sasiadradrama.

⁶ Kikai hukuingi kaika padaruru numiane kwini, mialri pasalraelre kawmasane, la aru kaadrau, si pumadru, mia sakapathagilane sakilalra numi si ka patengatengane thingale ku migemi ki Twaumase, mararaamau kaadrau, pumadru.

⁷ Kunumi twalai numi ki papapalra nai ka Ipahurase thingale kikai hukuingi, kai lasu pasiakai naiane kaamani ku patengane ku kidremedreme asasiakawlu ki Kirisitu.

⁸ Pangukai ku tabaadhane ki Siri numiane ku sakialibake amani kai lasu ka peaelaela naiane.

⁹ Lakamani, twalai ku takilalrane nai ku pangukai numiane ku vaga, kai nai watelrai ku apasikaiyane numiane inulri, si kitubi ki Twaumase ku apatwaladhane numi ki Siri malra ku makaelaela ku lrigilane si athingalane, la dulru makathingale ku kidremedremeini.

¹⁰ Lu kamiyaiya kai, ku tapanianianiakane mamamwa ku ani pia kwini iya ki Tamatama, sanaka maneemane pakiragadha iniane. Laka thadalrane, lri ikai ki apanianiakane numi pumadru ku makaelaela ku mathariri ka madru, ku athingalane papia ki Twaumase lai aru adili.

¹¹ Anu patwalai ki lrigu ka pukuini malra ku makeecenge ka puku, si ikai ku sakiadiadili tarumara sanaka maneemane. Arakaiya ku sakiaragai ku kidremedreme

¹² kiaseasena ki Tama ka yabelenge, asi lwiyane paswadalepe numiane kisupilri ku pasikaini ki lasinzia ikai ki waledra ka kuni ku nipikaiyane ka akaesadhane.

¹³ Palribulu mitane pakidaili ki dradrimitane, la panianianiaketa ikai ki tailebeane ki tagemegemane ku puku ki kadalameini ka Lalake.

¹⁴ Ngukai ki kadalameini ka Lalake, watarumarangata ku angilralrainganeta, si kipacepengata ku pasalrivane.

Kirisitu si awnganeini

¹⁵ Ku Kirisitu amani ku tangimiamiane ki kaika maka dreleta ka Twaumase, ka walribate sanaka maneemanenga ka tinueapane.

¹⁶ Ngwakai iniane, ku Twaumase la bekacenga belenge kawmasane sanaka maneemane: Ku adrelane si kai adrelane, paelre ki ngwakai ki abake ku yataetalane, ku warathudu, ku maerece, ku magagemegeme. Ngwakai iniane, la pasikai iniane, ku Twaumase wabekacenga patuelre kai kiacaebe belenge.

¹⁷ Ku Kirisitu yakainga aswala ki sanaka maneemane; sanaka maneemane ngwakai iniane si acegecege.

¹⁸ Amani ku awlru ki kiwkai ka kinawmasaneini; amani ku tatwaladhane ki bavane ka niake. Amani ku tinueapane, ka aswalaalanga siela twalai ki wapacai, ku patharevane yai lrika abebeelengenga ikai ki sanaka maneemane.

¹⁹ Ku Twaumase ngiakakamani kelrete ku akitulrepengane ku tangimiane ukalrivili ki Lalake,

²⁰ ngwakai ki Lalake, ku Twaumase malrithethenga ku apelaneini makakathariri patuelre kai lepawngane. Ku Twaumase ngwakai ki tapacadhane ki Lalakeini ibelenge ki ziwzika si pangimia ku rathudane, lu dulru kai belenge kai kawmasane siwlriana peela papia iniane.

²¹ Kunadruma, ngwakai ku ngilisianane ki tangivelevelane numi si ku kidremedreme numi kidailinga ki Twaumase, la abadhanga numi iniane.

²² Kaiasasane, ngukai ki tapacadhane ku kinawmasane ki Lalakeini, ku Twaumase paatalraginga numiane iniane, pakai ku akabulane numi icucubungu iniane, si kakadrwa ku pwalane, kakadrwa ku atakaiyane kikaelaela.

²³ Tara pangimia ku takisuswane numi, acegecege ikai belenge ki makecenge ka karwalai, madha cilricilri ku tarumara numi sakapathagilane ku hukuingi si tarumara numi ku sidramane. Kaiasane, kikai Hukuingi pasalraelrenga kawmasane, kwaku ka Pawru amaniaku ku sasiakawlu kai ki hukuingi.

Awngane ki Pawru

²⁴ Kaiasasane lu kidremedremaku ku tapasikaiyaneini numiane kwalri taingeane ka matiakiragai; asi lwiyane lu kipakwalriaku ikai ki kinawmasaneini, amani kikai kiwkai, ku kiadilili si kai tulrepengeana ku akwalriane.

²⁵ Pakai ku amuesadhane numi, ku Twaumase wabaai nakwane kikai awngane, la asasiakawlaku ki kiwkai. Ki kikai awngane yai lri pakatwasaku pelaela ku kiatulrepenge ka hukuingi,

²⁶ amani ku twalai ki tamacucungulane ka lrikisi papia ki umawmase sekete ka kaika athingalane ka matiasamaimali, kikai kaika athingalane ka matiasamaimali kaiasasane papianga ki umawmaseini putaluvaivai.

²⁷ Ku kikake ki Twaumase yai lri pathingale ki umawmaseini, kikai kaika athingalane ka matiasamaimali yai, ku Kirisitu yakai adringi ki niake numi, ka amia kikai, kunumi lri kisupilri numi ku lrigu ki Twaumase.

²⁸ Lakamani, lri pelaela nai ki sanaka umawmase patharukai ki Kirisitu, arakai ku makaelaela ku lrigilane bulru ki laumawmase, pakai ku arakane sanaka aneanenga pucucubungu ki Twaumase, si kaamani ku amabeanga ka sinzia.

²⁹ Pakai ku apadarurane kai ki tangadrane, arakaiyaku ku baai ki Kirisitu ku maadrau ku puku, si kai takidulru, pakaelreaku ku puku kaungu.