Kavagavagane 9 - Ngudradreadrekadhane Ka Sisiu 魯凱語聖經

Thingalane si kulrungane

¹ Ku thingalane twadaane ku daaneini, si cegecege ku pitu ku ulrudru.

² Kwi alisu pangiakaneane la culu ku lwange si kiu, si tubava, la pucukwi.

³ Kwi alisu siakawlu ki sasiakawlu ka laababai katwase sarubu ki laumawmase, la ikai ki taka abebeleenganenga ki cekele tawtau,

⁴ “Kadrwa ku thingale ka umawmase, bwala!” La papia ki makulrungu ka umawmase iya kai,

⁵ “Bwala kanea kai padulruli kai akaneane, la ungulu kai sangwaesai kai tubavali.

⁶ Kidaila ki sakaredele ka kadrwa ku thingale ka umawmase, la dulru panianiake; dadavaca ngukakai ki thingalane ka kadalranane.”

⁷ Alaiyasi tupelasu ku tapasalrivane ki ngiakalrilrigu ka umawmase, amani kudra ngiatatusinalreme; ku kiasanu kaelaela ki tangangangace ka umawmase, amani kudra ngiakakabebetethe.

⁸ Madha kaelaelaela ku tapasalrivane ki ngiakalrilrigu ka umawmase, asi lwiyane kwi lasu lri kagirimucu muswane. Lu bulrusu ki ngiathingale ka umawmase, kwi lasu lri kathalrai kilibake muswane.

⁹ Lu bulrwane ki ngiathingale ka umawmase kwini lasu lri aru thingale; lu bulrwane ki mwalecege ka umawmase kwini lasu lri aru drima ku thingalane.

¹⁰ Ku mwasakene mukuludru ki Tamatama yai sapathagili ki thingalane; ku wathingale ki Sanianiangenga amani ku ngiathingale.

¹¹ Kai thingalane lri pakalragi ki niakesu.

¹² Lu ikai ku thingalanesu, ku lri kaesai amanisu; lu kalrasesu ki thingalane, ku lri asipunu laka amanisu.

¹³ Kai kulrungane mia ki mangariangiangi, kadrwa ku thingale, kadrwa ku inwane ka ababai.

¹⁴ Kwi alisu wanene ikai ki lrawlrawdru ki daane, la nene ikai ki takaabebelenganenga ki cekele,

¹⁵ la papia tawtau kudra ki maracacacange katwatwase ka laumawmase,

¹⁶ “Bwala, ka kadrwa ku thingale ka laumawmase!” Kwi alisu papia ki makulrungu ka umawmase iya kai,

¹⁷ “Ku nikupane ku acilai maiya malimeeme, ku nikupane ku pange laka sangulrelreme.”

¹⁸ Ku lri kipamatikuru ku umawmase kai wathingale ku apacadhane ala ka yakai kwini ki alisu, ku papia ki alisu katwase, twavereverenga mwa ki swadriadringi ki saleleebenga.