Kavagavagane 8 - Ngudradreadrekadhane Ka Sisiu 魯凱語聖經

Wadrengedrengere ki thingalane

¹ Kilalra, watawtawtau kai thingalane, maralealeale kai lrigilane.

² Kwi alisu acegecege ikai lrelrelrege thili ki kadalranane, acegecege ikai ki makakalrivatha ka kadalranane.

³ Kwi alisu yakai ki lrawlrawdru ki cekele, yathili ki lrawlrawdru ki cekele, si tawtau iya kai:

⁴ Laumawmasee, lri papiaku numiane kawriva; lri papiaku kai kawmasane ki sanaka umawmase kawriva.

⁵ Lavavalake numi? Kicawcakwana kalrigili! Makulrungu numi? Kisilapa ki athingalane!

⁶ Kilalra, kai walribate ka taavavaganeli; ku pelaelali numiane ku vaga pacengecenge patuelre.

⁷ Ku taiyaneli patengane ka sabulrwane; mavalracevacaku ki watavuvulrucu.

⁸ Kai vagali patengane ka kadrwa ku draedrangelrane, kadrwa ku apakilrukilrungu, kadrwa ku nipasalrivane.

⁹ Papia ki yakai ku thingalane ka umawmase, pwalringalringau patuelre; papia ki ngiathingale ka umawmase, pacengecenge patuelre.

¹⁰ Maesaesai pilri ki sabulrwaneli kamani, si kai malra ku gingi; maesaesai tarumara ku lrigilane kamani, si kai malra ku kakingiane,

¹¹ asi lwiyane, ku thingalane walribate ki tinukucingalrane ka kasilwane; ku silasilapesu kadrwa ku navaevanga ku walribate nakwane.

¹² Amaniaku ku thingalane, yakainga ku tadrelaneli; yakai ku lrigilaneli, ka kiatulrepenge ku tapangimiane turingaringau.

¹³ Ku mwasakene mukuludru ki Tamatama amani ku magirimucu ki ngialisiane; magirimucaku ki ngiakalrilrigu, ki ngiapaparamuru, mavalracevacaku ki kai pacengecenge si tavuvulrucane.

¹⁴ Yakai ku kikakeli, yakai ku lrigilaneli. Ngiathingalaku ki lakakudhane, la kakecengaku.

¹⁵ Paralubaku ki latalialalai rathudu, la paralubu ki warathudu cegecege ku aparamaramavane.

¹⁶ Kai kawmasane sanaka warathurathudu satalu nakwane makanaelre; ku warathudu si talialalai pangwakai nakwane si magagemegeme ku puku.

¹⁷ Ku madalame nakwane, lri mialriaku kadalame iniane; ku wasilape nakwane, lri tara kidringai.

¹⁸ Ku akaesadhane si lrigu amaniaku ka wabaai; ku apacungulane ngiesadhane si ngiradhekanane yakaai nakwane patuelre.

¹⁹ Ku patwalaisu nakwane malra, walribate ki kakingiane, walribate ki kagingiane.

²⁰ Wadadavacaku ikai ki madringelrese ka kadalranane; yakaiyaku ki kadalranane ki dringelresane katwatwase.

²¹ Patarwamaraku baai ku akaesadhane ki madalame nakwane ka umawmase; arakaiyaku ku makucingalre ku tacekecekelane pasuete ki daaneini.

²² Ku Tamatama sakaiyana bekace kawmasane, ikai saka nadrumadrumadruma, yakainga naaku.

²³ Ikai satau pathagili, sakaiyana ngidarepe kai kawmasane, kiapacegecegenga naaku.

²⁴ Sakaiyana adrelane kai laveke, sakaiyana ikai ku berai ki acilai, kiatulalakenga naaku.

²⁵ Sakaiyana kibekace kai maadrau ka lalregelrege, sakaiyana acegecege kai lalrelrelrege, yakainga naaku.

²⁶ Sakamani kwidra, ku Twaumase kaiyana wabekace ki kadaengane si ubulane, adravane ka tikiyane ka thuvugu kadruana.

²⁷ Ku Twaumase wacegecege subelebelenge, si agisi ku pagisane subelebelenge;

²⁸ Ku Twaumase yakai belenge pangiraeragelane ku ememe, ikai ki laveke la muelebe ki berai,

²⁹ twapagisane ki laveke, ku kaika alribatane ki tangukaiyane; ku Twaumase sacegecegecege ku karwalai ki kadaengane, yakainga naaku kwini.

³⁰ Lu ikaiyaku thili iniane miaku ki taratudadaane, ka amani ku kiragaragaini lukakaiyaiyaiya; taikaiyanaku cucubungu iniane kirararagai,

³¹ si kadalame ki kawmasaneini, kadalame ki yakawmasane ka umawmase.

³² Lalalakeli, kaiasasane kilalra si pasalaladha nakwane, singikaiya ki vagali pangimia, lri ikai ku akiragadhane numi.

³³ Kilalra pasalaladha ku kibulrunga numi, kisilapa ki thingalane, madha kalralrase iniane.

³⁴ Ku kialalra pasalaladha ku vagali ku umawmase mwaesai turamuru! Kwi lasu luka kaiya yakaai drangalrungalru ki lrawlrawdruli, kwi lasu yakaai ki lrawlrawdruli ukalavalava.

³⁵ Ku kiadringai nakwane, amani ku kiadringai ku niake; kwi lasu lri malra ku migemi ki Tamatama.

³⁶ Ku kai kiadringai nakwane ku umawmase yai ngiakakabebetethe; ku magirimucu nakwane amani kudra madalame ki apacadhane.